283. (20. ) In sancti Petri ad Vincula.

1. Benedictus Dominus Deus Israel, qui erexit nobis cornu salutis.

2 a. Nam salutis cornu, fides Petri apostoli,

2 b. Ventilans destruxit

huius principem saeculi.

3 a. Quis est, qui vincit hunc mundum et eius principem,

3 b. Nisi qui credit, quod Petrus confitens docuit?

4 a. Tu, quem homines hominem dicunt excelsum sicut unum ex prophetis,

4 b. Super homines atque prophetas es Christus, viventis Dei filius.

5 a. Fortior inferi

est portis haec fidei clara confessio,

5 b. Quam caro et sanguis nequaquam revelavit, sed pater caelestis.

6 a. A petra sumitur nomen Petri, qui iunctus angulari lapidi portatur et portat

structuram firmam totius ecclesiae.

6 b. Haec est victoria vincens mundum fides nostra, deprompta per Petrum, quae vincula dissolvit, tenebras fugat, aperit carceres.

7 a. Haec est laetitia suo pastori congaudentis ecclesiae,

7 b. Quod lupus Herodes frustratus fremit et plebs Iudaica gemit.

8 a. Victo Herode succedit Nero vincendus a Petro apostolo.

8 b. Illum vivendo, hunc moriendo devicit vinci nescius Petrus.

9 a. Cum Simone quoque mago fuit illi maximus conflictus;

9 b. A Simone tamen magno Simon magus cecidit devictus.

10 a. Nunc, pastor ecclesiae, nos vinctos respice duabus catenis magnis, culpis culparumque poenis.

10 b. Culpas septuagies septies dilue, poenas amovendo sempiterna gaudia obtine.

11 a. Lupos rapaces arce de gregibus Christi, quos pascendos suscepisti,

11b. Simonis magi fraudes destrue malignas per tuas preces benignas,

12. Ut portis inferi fractis et caeli elevatis

grex tui regiminis pascatur vitae pascuis.