269. (6. ) In Conversione s. Pauli.

1. Dixit Dominus: ex Basan convertam, convertam in profundum maris.

2 a. Quod dixit et fecit, Saulum ut stravit Paulum et statuit

2 b. Per verbum suum incarnatum, per quod fecit et saecula.

3 a. Quod dum impugnat audivit: Saule, Saule, quid me prosequeris?

3 b. Ego sum Christus; durum est tibi, ut recalcitres stimulo.

4 a. A facie

Domini mota est terra contremuitque mox et quievit.

4 b. Dum cognito

credidit Domino, Paulus persequi cessat conchristianos.

5 a. Hinc lingua tuorum est canum ex inimicis rediens ad te, Deus,

5 b. Dum Paulus in ore omnium sacerdotum iura dat praeceptorum,

6 a. Docens crucifixum, nec esse alium praeter Christum Deum,

6 b. Cum patre qui regnat et sancto spiritu, cuius testis Paulus.

7 a. Hinc lingua sacerdotum more canis dum perlinxit, legis et evangelii duos molares in his contrivit.

7 b. Corrosit universas species medicinarum, quibus curantur saucii, reficiuntur enutriendi.

8 a. Qui convertendis

conversum converteras Paulum, vas electum,

8 b. Per quem conversus ad nos tu vivificas, Christe, peccatores.

9 a. Quo docente Deum mare vidit et fugit, Iordanis conversus est retrorsum,

9 b. Quia turba gentium, vitiorum rediens profundo, Og, rege Basan, confuso

10. Te solum adorat, Christe, creatorem, quem et cognoscit in carne venisse redemptorem.