266. (3. ) In Assumptione beatae Mariae.

1. Exsulta, exaltata super creata cuncta,

2 a. Creatoris omnium genetrix Dei, virgo virginum,

2 b. Stella maris, Maria, caeli regina, mundi domina.

3 a. Cui chorus omnis obviat in excelsis beatorum spirituum,

3 b. Jubilans dignis laudibus exeunti hinc, Aegypti de finibus.

4 a. Quam Christus per seipsum hic visitat, de carnis ergastulo suscipiens matris animam,

4 b. Honorem tibi praebens, quem fieri praecipit parentibus de filiis a se genitis.

5 a. Sed cum sit sepultum corpus tuum mortis debito,

5 b. Adhuc ne sepultum sit, est tuo dignum filio.

6 a. Quam solidavit

ignis spiritus sancti, testam tui corporis virginei, in qua patris splendor voluit incorporari,

6 b. Hanc nec corrumpi nec putredine solvi optat tibi

plebs fidelis Domini et corona resurgentium nunc te laetari.

7 a. 0 quanta vel qualis gloria tuo sufficit corpori plus quam virgineo.

7 b. Hinc, quod comprehenderat incomprehensibilem Deum cuncta comprehendentem ?

8 a. Qui sic suam in te devinxit omnipotentiam, quod nulli sine te suam monstrabit praesentiam.

8 b. Nam te sine sicut Deus non venit ad hominem, sic homo sine te ad Deum nunquam perveniet.

9 a. Sed nec patriarcha nec propheta nec plus quam propheta ante te pervenit ad Dominum adhuc clauso caeli regno,

9 b. Exspectantes tui ventris fructum, qui est spes sanctorum, per quam exspectatus fidelium caeli claustra reseravit.

10 a. Cuius claves tenens Petrus nulli pandit, nisi tuum natum adorantibus.

10 b. Qui ad tuum imperium dat ingressum se tibi devote commendantibus.

11 a. Inter quos noscat nos natus ex te virgine notatos suae crucis caractere.

11b. Cum dederit dilectis suis somnum, nos simus filii mercis fructus ventris tui.

12. Qui fructus

in se nos dignetur mortis in somno sopire et cum sanctis suis resuscitare.