268. (5. ) De s. Maria Magdalena.

1. Laus tibi, Christe, qui es creator et redemptor, idem et salvator;

2 a. Caeli, terrae, maris, angelorum et hominum

2 b. Quem solum Deum confitemur et Dominam;

3 a. Qui peccatores, venisti, ut salvos faceres,

3 b. Sine peccato peccati assumens formulam.

4 a. Quorum de grege ut Chananaeam Mariam visitasti Magdalenam,

4 b. Eadem mensa verbi divini

illam micis, hanc refovens poculis,

5 a. In domo Simonis leprosi conviviis accubans typicis.

5 b. Murmurat pharisaeus, ubi plorat femina criminis conscia.

6 a. Peccator contemnit compeccantem, peccati nescius paenitentem exaudis, emundas, foedam adamas, ut pulchram facias.

6 b. Pedes amplectitur dominicos, lacrimis lavat, tergit crinibus lavanda, tergenda, unguento unxit, osculis circuit.

7 a. Haec sunt convivia, quae tibi placent, o patris sapientia,

7 b. Natus de virgine qui non dedignaris tangi de peccatrice.

8 a. A pharisaeo es invitatus, Mariae ferculis satiatus.

8 b. Multum dimittis multum amanti nec crimen postea repetenti.

9 a. Daemoniis eam septem mundans septiformi spiritu,

9 b. Ex mortuis te surgentem das cunctis videre priorem.

10 a. Hac, Christe, proselytam signas ecclesiam, quam ad filiorum mensam vocas alienigenam.

10 b. Quam inter convivia legis et gratiae spernit pharisaei fastus, lepra vexat haeretica.

11 a. Qualis sit, tu scis, tangit te quia peccatrix, quia veniae optatrix.

11b. Quidnam haberet aegra, si non accepisset, si non medicus adesset?

12. Rex regum dives in omnes, nos salva

peccatorum tergens cuncta crimina, sanctorum spes et gloria.