278. (15. ) In Exaltatione s. Crucis.

1 a. Serpens antiquus vicit in ligno,

1 b. Primo parenti virus infundens.

2 a. Quo claudicat dudum in posteris carnis successio,

2 b. Et colligit spinas et tribulos prona posteritas.

3 a. Verum arcano gratiae commercio subvenit plasmator, protoplastum reformans veterem.

3 b. Ligno contractum

primum Adam secundus extendit in ligno, in quo mortem vita mortificat.

4 a. Christi figuram aeneam intuebatur populus antiquus in ligno,

4 b. Et intuentem populum

Christus venturus in carne salvabat a morte.

5 a. Hoc crucis tropaeum praecessit crucem, quod in ligno crucifigendi crucifigendus agebat.

5 b. Qui ferens in cruce nostros languores ovem, quam hostis abstulerat, victor reportat umeris.

6 a. Christe Iesu,

fili Dei athanatos, qui unigenitus theotocos, intactae virginis, passus es in cruce,

6 b. Dele culpam

et, quam pro culpa patimur, tolle afflictionem corporis, hagios o theos, per virtutem crucis.