CAPUT VI.

De figura florum in genere.

Figura autem florum diversa est quidem valde in. specie et numero : sed tamen in communi, ut quidam sapientium tradiderunt, triplicem habet differentiam. Aut enim praetendit obscuram quamdam convenientiam cum avis figura, sicut flos oleris qui vocatur aquilea, eo quod quatuor aquilas flos ejus figurare videtur. Aliquid autem simile hujus habet flos urticae mortuae et violae, nisi quod alas avis non ita exprimit sicut aquilea. Aut praetendit figuram campanae sive pyramidis, sicut ligustrum et flos enulae campanae, et multarum aliarum vegetabilium. Aut etiam praetendit figuram radiorum stellae, sicut rosa, et haec figura omnibus quidem communior in vegetabilibus invenitur. Sunt autem quidam flores aliquid convenientiae tam cum campana quam cum stella habentes, sicut flos lilii et nigellae et balaustiae et plures alii. Et causas harum figurarum non oportet praeterire.

Sciendum igitur, quod materia floris in communi tres habet diversitates : licet enim universaliter subtilis sit, tamen quaedam est magis viscosa in genere suo, et quaedam minus, et quaedam medio modo se habens. Et illa quidem quae magis viscosa est, calore solis evocante eam, producitur in longius, et cohaeret sibi in circuitu : et quando in partibus non est aequalis viscositatis, efficitur anfractuosa obionga : et forte separantur ex ea quaedam sursum ut alae quaedam, vel ut cauda avis, vel sicut utrumque illorum : et in parte illa quae magis est viscosa, acuitur ut rostrum avis, et forte curvatur per calidum exsiccans et nimis trahens humidum, et tunc praetendit quamdam avis figuram. Si autem sit aequaliter subtilis, parvam aut nullam habens viscositatem sensibilem, undique per circuitum evocatur aequaliter, et statim aperitur et dilatatur, et tunc praetendit radios ex uno puncto corporis lucidi egredientes. Si vero sit undique aequalis viscositatis, evocabitur a sole in figuram campanae: et si sit medium habens humorem inter haec in inferioribus, poscere debet campanae figuram, ubi humor magis sibi cohaeret, et in superioribus ubi magis dissoluta est viscositas, divaricabitur sicut radius stellarum.

Pythagoras tamen et sui sequaces stellas terrae flores esse dixerunt, asse-

rentes omnem stellam convenientiam habere cum flore aliquo sicut parentem cum prole. Dixerunt enim omnem florem pyramidaliter ad stellae tendere figuram : et ex materia quidem habere constrictionem et coarctationem ad punctum unum sicut habet pyramis. Ex virtute autem caelesti dilatationem similem radiationi corporis luminosi quod stellam vocaverunt. Omnia (ut inquiunt) moventur, ut divino et caelesti simile aliquid participent : et cum terra percipere hoc secundum se non possit, studet hoc acquirere in suis generatis : et ideo sicut ea sursum versus caelum porrigit, ita etiam caelestem in. eis figuram quantum possibile est sibi imitatur. Hujus autem signum dixit esse Pythagoras, quia flores clauduntur nocte cum subtrahitur lux solis. Hujus autem causa nullam aliam esse volebat, nisi quod natura florum gaudet convenienti, et exsultat et se aperit ad illius perceptionem, et tristatur contrario, et clauditur et contrahit se in praesentia contrarii. Motum enim contractionis et dilatationis, et sensum convenientis et contrarii dixisse inesse vegetabilibus, et maxime floribus in quibus dilatatio et contractio sensibiliter apprehenduntur. Quod autem vegetabilia sensum non habeant, neque motum, jam satis in praehabitis declaratum est.

Dicemus igitur hujus dilatationis et constrictionis et contractionis non esse causam sensum vel motum aliquem animalem, sed potius sole praesente multiplicatur calor, et in spiritum diffunditur humidum, qui est in substantia florum, et quaerens majorem locum, dilatatur sole praesente : frigore autem noctis per contrarium inspissatur et opprimitur, et ideo in seipsis contrahuntur et clauduntur. Latere autem non oportet quod omni floris figurae ut in pluribus accidit concavitas : concavus enim invenitur omnis flos notus apud nos. Et illius causa pro certo est, quod humidum subtile spirituale quod est materia florum, vaporat facillime, et ventus generatus in ipso concavum facit florem, viscositate humoris se continente circa ventum in interioribus sui generatum, et hoc vento phlegmatico dulce et incensum cholericam ad interiora floris deducitur, et in concavitatibus ipsius floris colligitur ab apibus et aliis parvis animalibus.

Haec igitur in communi de figura florum sint dicta a nobis, quoniam ex his et aliae figurae facile poterunt adverti.