39. De sancta Katharina.

In 1. Vesperis.

R. Jam Christi thalamum

scandit Katharina beatum,
Juncta suo sponso,

pro quo tulit aspera mundo ;

V. Obtineat precibus,

pateat nobis paradisus.

Ad Magnificat.

A. O quam mirificis

Deus ordinat omnia factis,
Virginibus magnos

tribuens ex hoste triumphos,
Cum quibus aeternam

meruit Katharina coronam.

Ad Matutinum.
Invitatorium.

Laudetur Dominus,

Sabaoth cui nomen, et agnus,
Per quem sacrilegum

vicit Katharina tyrannum.

In 1. Nocturno.

Antiphonae.

1. In bello victus

Constantinoque fugatus
Alexandrinam

venit Maxentius urbem.

2. In qua daemonibus

libamina ferre paratur,
Ut veniant omnes,

cito mandat per regiones.

3. Adsunt gentiles

mixtim Christoque fideles
Caesaris ad jussum
malesanum perficiendum.

Responsoria

R 1. Nobilis et pulchra

prudens Katharina puella
Flagrat amore Dei,

spernit vaga gaudia mundi,
V. Cui rex carne pater

fuerat reginaque mater.

2. Martyrium sitiens,

libamina Caesaris horrens
Exclamat Christum,

praeter quem nil venerandum,
V. Daemonibus plena

sunt haec, ait, idola, templa.

3. Haec quinquagenos
oratores superatos
Dirigit ad coelos

aurum velut igne probatos,
V. Efficiens testes

fidei, quos pertulit hostes.

In 2. Nocturno.

Antiphonae.

1. Ecce dies tristis

aderat plenusque doloris,
Quo Christi servos
jussit libare tyrannus.

2.Ecclesiae nati

moerentes et stupefacti
Auxilium Domini

poscunt super haec benedicti.

3. Fit sonus et clamor,

animalia muta trahuntur,
Vox diversa sonat,
urbs lato tota resultat.

Responsoria.

1. O quam felices

per te, sanctissima, plures,
Quos jubet occidi

pro Christo turbidus hostis,
V. Cum duce Porphyrio

fit martyr Caesaris uxor.

2. Impius hanc Caesar

sisti jubet ante tribunal,
Hanc ut pervertat,

sicut draco vel leo certat,
V. Illa manet constans,

blanda nec aspera curans.
3. Virgo flagellatur,

crucianda fame religatur,
Carcere clausa manet,

lux coelica fusa refulget,
Fraglat odor, dulces

cantant coeli agmina laudes ;
V. Sponsus amat sponsam,
salvator visitat illam.

Prosella.

Cantant coeli milites
collaudantes virginem ;

Atque, ne deficiat,
roborantes martyrem.

Illa tuta

manens carnificem

Nec poenas ex-
horret nec Caesarem,

Sed laeta Domino
persolvit laudes.

In 3. Nocturno.

Antiphonae.

1. Processit virgo

Christo comitante patrono,
Adfuit et turba,

sapientum fronte superba.
2. Haec Christum Dominum

firmaverat esse sequendum,
Illi falsorum

contra simulacra deorum.

3. At Christi sponsa

Christi solamine fulta,
Vicit rhetoricos

vera ratione maeandros.

Responsoria.

1. Percussa gladio

dat lac pro sanguine collo,
Quam manus angelica

sepelivit vertice Sina,
V. Membris virgineis

olei fluit unda salubris.

2. Horrendo subdenda

rotarum machinamento,
Virgo Deum clamat,

de coelis angelus adstat,
Ecce repentinam

dant plebs rotaeque ruinam,
V. Tamquam Chaldaeis

quondam fornax Babylonis.

3. O mater nostra,

ter sancta quaterque beata,
Cum prece devota

famulantem suscipe vota,
V. Jam Christo juncta

sponsoque tuo sociata.

Prosella.
Aeternae

virgo memoriae,
Quam sibi

despondit rex gloriae,

Virginis

proles egregiae
Sponsusque

virginis ecclesiae.

Tu gaudes

hodie dono gratiae,
Cantas in

coelo carmen laetitiae.

Te laudantes

in terra respice
Atque nostra

clementer suscipe
Vota.

In Laudibus.

Antiphonae.

1. Postquam crudelis

invictam viderat hostis
Mentem virgineam,

velut amens fertur in iram.

2. Exacuit dentes

furibundus ut leo frendens
In sponsam regis

Christi sine fine manentis.

3. At Katharina Deum

servans in pectore fixum
Arguit insanum

manifesta voce tyrannum.
4. Post haec carnifici

mandatur voce tyranni,
Ut caput illius

gladio praecidat acuto.
5. Felix et digna nimis
es Katharina beata,
Quae per martyrium

sequeris dominum domino-
rum.

Ad Benedictus.

A. Inclita martyr, ave,

pro sanguine lacte fluente
Designas cunctis

nivei documenta pudoris,
Alta tenens coeli

pietatem posce superni
Judicis, ut nobis

det requiem miseris.

In 2. Vesperis.
Ad Magnificat.

Mons legis Sina

suscepit vertice dona
Corporis afflicti,

mons Christus culmine coeli
Suscipiens animam

ditavit honore beatam,
Cujus nos precibus

salvificet Dominus.