19. De sancto Elzeario.

In 1. Vesperis.

Antiphonae.

1. A dextris sedet gloriae,
Nam a dextris justitiae

Sedit vita mortali,
Virgam virtutis explicat
Et nationes judicat

Concussans caput mali.
2. Justorum in consilio
Dulcique contubernio

Et congregatione
Mandata dat fidelia,
Dum salutis utilia

Jubet Christi sermone.

3. Dispergens dans pauperibus
Pietatis visceribus

Commodans miseretur,
Disponens se judicio,
Cum recta generatio

Christi benedicetur.
4. Elzearium nobilem
Respexit Deus humilem

In terra conversantem,
Collocans cum principibus,
Choris quoque coelestibus

In gloria lactantem.
5. Laudant gentes et populi,
Illustres magis saeculi,

Qui manet in aeternum,
Clarum sequentes comitem
Per sanctitatis tramitem

Ad bravium supernum.

Ad Magnificat.
A. Proles digna Provinriae,

Stirps generosa comitum,
Princeps summae clementiae,
Decus et honor militum,
Elzeari beate,
Exora, dari veniae

Nobis et vitae meritum
Tandemque fructum gloriae
Post hujus vitae transitum
In coeli claritate.

Ad Matutinum.
Invitatorium.

Regem laudantes omnium
In psalmis jubilemus,

In quo et Elzearium
Voce magnificemus.

In 1. Nocturno.

Antiphonae.

1. Beatus vir consilium
Devitat impiorum,
Piorum fert vestigium
Sequens viam justorum.

2. Adversus Christum Domini
Plangit conventionem,
Qui vitam dedit homini
Per suam passionem.

3. Voce clamat ad Dominum
In morte dormiturus,
Post vultum plenum luminum
Monstrat resurrecturus.

Responsoria.

1. Puer beatus cingitur

Ad carnem chorda dura
Adolescensque sequitur

Sermonum Christi jura

Familiamque traditur

Pia formasse cura,

V. Per quam Deus extollitur

Et proximus diligitur

Intentione pura.

2. Carnis horrens delicias
Cilicio vestitur,
Corpus sentit angustias

Amictus, dum sopitur,
Sic et per abstinentias
Jejuniis nutritur.
V. Jocos sprevit et nuptias
Et sacculi blanditias,

Dum Christi crux ambitur.

8. Desponsatur virginitas
In matre salvatoris,
In sancto fulget puritas,

Conjugium honoris,
Sic fit perfecta caritas,
Vim vendicat amoris.
V. Cor, gestus et activitas
Per cunctas tenens semitas
Virginei pudoris.

In 2. Nocturno.

Antiphonae.

1. Cordis signat laetitiam
Sereni vultus lumen,
Nam mundam conscientiam
Sibi dat Christi numen.

2. Verba percepit auribus
Et pauperum clamorem,
Quorum necessitatibus
Se dat intercessorem.

3. Honor, corona, gloria
Confessori beato,
Dei magnificentia
Ad coelos elevato.

Responsoria.

1. Vir lenis, mitis, humilis
Se clamat peccatorem,
Dulcis, blandus, affabilis
Nec despicit minorem
Egenorumque pabulis
Se praebet servitorem,
V. Leprosos lavans osculis
Mulcet cultusque nobilis
Se monstrat contemptorem.

2. Vir rectus a justitia
Non novit declinare,
Amor, vis, munus, odia

Hunc nequeunt turbare,
Sic perfecta judicia
Perfectus scit amare,
V. Juncta misericordia
Damnatorum supplicia
Docebat deplorare.

3. Caritatis incendio

Salutem animarum
Verbis sitit et studio

Viribus medullarum.
Hinc nullo pensat pretio,
Quod mundus habet carum,
V. Hinc pius in obsequio
Egenis fit auxilio

Plerisque in poenarum.

In 3. Nocturno.

Antiphonae.

1. In monte sine macula
Quievit castitatis,
Hic Dei tabernacula
Habitat cum beatis.

2. Invenit tua dextera

Omnes, qui te oderunt,

Cunctis dum donas munera,

Qui tibi mala quaerunt.

3. Cordis habens munditiam
Et manum innocentem
Ascendit montis gloriam
Terrena transcendentem.

Responsoria.

1. In summa vehit spiritum
Orationis alis,
Feruescit in intuitum
Adspectus facialis,
Devote fundens gemitum
Pro retractivis malis ;
V. Sic sentit cor imbibitum,
Ut cum venit ad reditum,
Nec paret sensualis.

2. Invicta patientia

Christi armat athletam,
Contemptus et opprobria
Mentem vere quietam,
Rerum quoque dispendia
Probant pace repletam,
V. Mors, languor, vis, fallacia
Nec tristant quaeque tristia
Animam semper laetam.

In Laudibus.
Antiphonae.

1. Praecinctus pudicitia
Supra carnis incendia

Ut dominus regnavit,
Decorem mentis induens,
Fortitudinem vestiens

Corpus terrae firmavit.

2. Servus Dei laetitia
Clarescit ad convitia

In exsultatione,
Divinum intrat atrium
In hymnis confitentium
Laudis confessione.

3. Sic super stratum proprium
Memor est per cilicium

Christi Jesu plagarum,
In quem sitivit anima
Et caro sibi proxima

Luce vigiliarum.

4. Patrem, filium, spiritum
Per operum circuitum

Semper benedicamus,
Sancti et corde humilis
Cum laudibus et jubilis

Magnalia canamus.

5. Terrae reges et principes,
Et juvenes et virgines,
Coeli laudate Deum,
Sequentes Elzearium,
Nam rex et princeps omnium
Ad coelum vexit eum.

Ad Benedictus.

A. Exsultet Apta civitas,
Quam exornat praeclaritas

Felicium membrorum,
Tantoque privilegio
Tu dotata religio

Ecclesiae minorum,

In te sunt ossa condita,
Quibus aegris est reddita

Completio votorum ;
Ad te, confessor optime,
Clamant languentes animae

Pro venia malorum.

In 2. Vesperis.

Antiphonae.

1. Ex utero principium
Et generis initium

Sumens stirpe clarorum
Die virtutis claruit,
Hinc sociari meruit

Splendoribus sanctorum.

2. In toto corde Dominum
Confitetur et luminum

Patrem laude septena
Sanctumque nomen Domini
Suo commendat agmini
Devotione plena.

3. Potens in terra timuit,
Cujus mandatis voluit

Beatus obedire,
Gloria et divitiae
Non poterant justitiae

Ipsius contraire.

4. Ex hoc nunc et in saeculum
Dei per solis circulum

Sit nomen benedictum,
Vosque laudate, pueri,
Puerum suo corpori

Tenentem finem strictum.

5. Laudate, gentes, Dominum,
Quo tempus per interminum

Veritas manet rata,
Cujus misericordia
Est per sancti suffragia

Super nos confirmata.