2. In Festo Inventionis pueri Jesu.
7. In Illatione Sanguinis Domini,
17. De beata Maria V. Lectio I.
71. In Translatione ss. Eleutherii, Pontiani et Anastasii.
74. In Translatione ss. Fortunati, Caii et Anthes.
85. In Translatione s. Matthaei.
86. De ss. Maximo, Juliano, Felicitate et Innocentio.
In 1. Vesperis.
Antiphonae.
1. Gaude, regina nobilis,
Virgo incomparabilis,
Rosa rosarum omnium
Et liliorum lilium.
2. Gaude, virgo dulcissima,
Cujus corpus et anima
Singulare miraculum,
Miraculorum speculum.
3. Gaude, cujus eloquia
Sunt sicut mala aurea,
Et cujus motus animi
Vincunt odorem balsami.
4. Gaude, cujus operibus
Tamquam stolis regalibus
Nitet corpus ecclesiae,
Vestitur rex justitiae.
5. Gaude, virgo amabilis,
Tota desiderabilis,
Da nobis desiderium
Videndi te et filium,
Ut nostro desiderio
Vestra accedat visio.
R. Gaude, decus ecclesiae,
Mater misericordiae,
Virgo mitis et benigna,
Sola bona, sola digna
Omni laude et honore
Omni loco et tempore.
V. Fac ad nostram solatium
Dilectum tui uteri
Nostrorum semper cordium
Totis medullis inseri.
Ad Magnificat.
A. Gaude, matrona caelica,
Exsultando magnifica
Deum tuum salutarem,
Qui te fecit singularem.
Tu ancillam Jesu Christi
Te vocari voluisti,
Sed, ut docet lex divina,
Tu ipsius es domina,
Nam jus habet et ratio
Matrem praeesse filio ;
Ergo ora suppliciter
Et praecipe sublimiter,
Ut nos in mundi vespera
Ad regna ducat supera.
Ad Matutinum.
Invitatorium.
Regentem sine fine
Christum adoremus
Mentisque dulcedine
Mariae jubilemus.
In 1. Nocturno.
Antiphonae.
1. Virgo, Deo plenissima,
Ad nos tua praesidia
Misericors, propitia
Converte, sancta Maria.
2. Te genetricem splendidam
Confitemur et unicam
Aeternae sapientiae,
Maria, tu nos respice.
3. Deterge nostra crimina
Corda sanans languentia,
Cui aegra clamat anima:
Succurre, sancta Maria.
Responsoria.
1. O spes divina,
via tuta, potens medicina,
Porrige subsidia
miseris, o sancta Maria,
V. In te gaudemus,
per te commissa dolemus.
2. Lux indeficiens,
venerabile sidus et ingens,
Illucesce pia
relevandis, sancta Maria,
V. Praeduce te patriam
tendimus ad superam.
3. O clemens domina,
spes desperantibus una,
Culparum venia
largissima, virgo Maria,
V. Per te vivamus,
ad te per te veniamus,
In 2. Nocturno.
Antiphonae.
1. Quibus te, virgo, laudibus
Attollere poterimus,
Quorum sordent eloquia
Et actus, sancta Maria.
2. Emunda conscientiam,
Conserva innocentiam,
Fidem in nobis robora,
O theotocos Maria.
3. Mentes nostras sanctifica
Tranquilla donans tempora,
Misericors, pacifica,
O theotocos Maria.
Responsoria.
1. Vera Dei genetrix,
humanae stirpis amatrix,
Ex te justitia
processit, sancta Maria,
V. Quae damnum reparat,
quod prima propago pararat.
2. O caeli porta,
nova spes mortalibus orta,
Duc, refove, sana
properantes, sancta Maria,
V. Ad te respicimus,
quam tota mente sitimus.
3. Oramus, domina,
carnis quos crebra ruina
Allicit ad vitia,
releves, o sancta Maria,
V. Parce libens miseris,
quae cunctorum misereris.
In 3. Nocturno.
Antiphonae.
1. Gaude, nostra sollemnitas,
Gaude, nova jucunditas,
O flos florem concipiens,
O rosa rosam pariens,
Per te mens nostra gaudeat
Et in Deo refloreat.
2. Gaude, quae pio filio
In virginali gremio
Dulcem infigens oculum
Suave dedisti osculum.
3. Exaudi nostra carmina
Acta delens peccamina
Et bona reddens perdita,
O sanctorum sanctissima.
Responsoria.
1. Sacratissima virginum,
Corruptae mentis oculum
In te rei defigimus
Et protegi deposcimus.
V. Te lacrimis, precibus
matrem pietatis adimas.
2. O spes nostra et gaudium,
Singulare refugium,
O sola salus omnium
Te caste diligentium,
V. Salve, salvatrix
et lapsorum relevatrix.
3. Gaude, regina praepoteris,
Aeterna luce praenitens.
Gaude, caelorum domina,
O virginum pulcherrima,
O misericordissima,
Gaude perenni gloria.
V. Fac nos laetari
faciemque tuam speculari,
Plenam virtutis
dulcedinis et pietatis.
In Laudibus.
Antiphonae.
1. O mater regis filii,
Cujus regni non est finis,
Felix dies ortus tui,
Qua illuxisti saeculis.
2. Per te divino jubilo
Jungamur caeli asylo,
Quo tecum Jesu Domino
Fruamur sine termino.
3. Laudent te nostra labia,
O virgo sacratissima,
Qui velamento tuarum
Nunc exsultamus alarum.
4. Caelum, mare et arida
Te benedicant, domina,
Nosque et nostra omnia
Benedic et sanctifica.
5. Collaudent Deum omnia
In matre sacratissima,
Cujus amori debitum
Persolvimus obsequium.
Ad Benedictus.
O angelorum gloria,
O pietatis viscera,
Subveni nobis, domina,
Plena misericordia,
Qui sedemus in tenebris
Ad te directis oculis.
Per Horas.
Ad Tertiam.
R. Salve, porta poli,
per quam lux splenduit orbi,
V. Fer pia devotis
auxilium famulis.
Ad Sextam.
R. Salve, Christifera,
caelesti munere digna,
V. Ora pro famulis,
o benedicta, tuis.
Ad Nonam.
R. Salve, Maria,
lux et mundi domina,
Nato tuo nos
clementer concilia.
In 2. Vesperis.
Ad Magnificat.
A. Ave, summi regis sponsa,
Virgo et mater, gloriosa
Caelorum regina,
Pretiosa
Paradisi rosa,
Stella rutilans, aurora,
Angelorum gloria,
Sanctorum laetitia,
Justorum subsidium,
Spes defunctorum,
Advocata pia
Esto nobis apud Deum
Semper, virgo Maria.