186. (76.) Ad Laudes.

1. Ecce, domus Domini,
en, fidelis populus,
Psalmis, hymnis, canticis
vacans spiritalibus.

2. Christus, cuius domus est,
ipsam sibi protegat
Et ovile proprii

gregis pastor muniat.

3. Canum spiritalium
tutelam adhibeat,
Lupos invisibiles
super illos arceat.

4. Angelorum praesidens
semper in custodia
Ad fidelis populi
vigilet praesidia.

5. Ad superbum zabulon
conterendum Michael,
Ad medendum sauciis
dirigatur Raphael.

6. Corda titubantium
Gabriel corroboret
Et perseverantia

stantes idem adiuvet.

7. Nusquam, cum sit regis hoc
caelestis palatium,
Ministris caelestibus
decet esse vacuum.

8. Horum ministerio

disponantur omnia,
Qui norunt, quae Domino
sint vel non sint placita

9. Christi vota populi
ipsi preces offerant,
Et, quid ipse voveat,
quid precetur, doceant.

10. Nihil cassis precibus,
nihil votis irritis
Hic fideles postulent
vel sibi vel aliis.

11. Quisquis hic fidelium
preces Deo fuderit,
Impetrasse gaudeat
se, quidquid petierit.

12. Giezita nullus hic,
nullus Simoniacus
Corrumpat haereticis
gregem Christi pestibus.

13. Quos a domo propria
per semet expulerit,
Iram eius sentiat,

quisquis hos reduxerit.

14. Deo patri gloria,

par sit honor filio,
Compar sit spiritui
gratiarum actio.

Libellus Tertius.

Praefatio.

Superioribus duobus libellis cotidianos feriarum hymnos et
sollemnitatum divinarum proprios digessimus. Nunc vero superest
ad caelestis gloriam regis et communem fidelium exhortationem ipsam
quoque superni curiam palatii debitis hymnorum, prout possumus,
efferre praeconiis. In quo quidem opere ipsi me praecipue adiuvent
meritis, quorum gloriosae memoriae qualiumcunque laudum munuscula
cupio persolvere juxta quod scriptum est "''Memoria iusti cum laude"
et iterum " Laudemus viros gloriosos." ''

Vos quoque obsecro, sorores carissimae Christoque dicatae,
quarum maxime precibus hoc opus agressus sum, vestrarum adiungite
devotionem orationum, illius memores beatissimi legislatoris, qui plus
orando quam populus potuit dimicando. Et ut caritatem vestram
in orationum copia largam inveniam, pensate diligenter, quam
prodigam vestra petitio nostram habeat facultatem. Dum enim divinae
gratiae laudes pro nostri ingenioli [modo] prosequi studeremus,
quod de ornatu deest eloquentiae, recompensavimus hymnorum multi-
tudine, singulis videlicet singularum sollemnitatum nocturnis proprios
componentes hymnos, cum unus solummodo hucusque hymnus in festis
quoque sicut in feriis ad nocturnos praecineretur.

Quattuor itaqua hymnos singulis festivitatibus ea ratione decre-
vimus , ut in unoquoque trium nocturnorum proprius decantetur
hymnus et laudibus insuper matutinis non desit suus. Ex quibus
rursus quattuor instituimus , ut duo in vigilia pro uno conjungantur
hymno, et duo reliqui similiter ad vesperas ipso die sollenni recitentur,
aut ita bini et bini in singulis vesperis dividantur, ut cum duobus
prioribus psalmis unus, cum duobus reliquis alius decantetur. De
cruce autem, memini, quinque conscripti sunt hymni, quorum primus
singulis praeponatur horis, invitans diaconem crucem de altari tollere
et in medio chori afferre atque ibidem eam quasi adorandam ac
salutandam statuere, ut in eius quoque praesentia tota per singulas
horas peragatur sollemnitas.