55. (40.) Paschalis rhythmus ad procedendum.

1. Paschalis festi gaudium
Mundi replet ambitum,
Caelum, tellus ac maria

Laeta promant carmina,
Et Alleluia consonis
Modulemur organis.

2. Solus ululet tartarus

Rapta praeda vacuus,

Fractos vectes et ferrea
Strata ploret moenia,

Quae subruit rex gloriae
Cum signo victoriae.

3. Stupenda lex mysterii.

Novum genus proelii !
Ligatus nexos liberat,

Mortuus vivificat,
Dumque vita perimitur,

Mortis mors efficitur.

4. Statera crucis pendulum
Mundi librat pretium,

Quod dum exactor petiit,
Ius antiquum perdidit,

Escam glutire nititur,
Sed hamo transfigitur.

5. Composuit chirographum
Protoplastus hominum,

Quod Christus post in alia
Solvit ligni tabula ;

Quae primus Adam scripserat,
Secundus obliterat.

6. Cum auctor vitae moritur,
Orbis et commoritur,

Sol radios operuit,
Lugens terra tremuit,

Templi velum dividitur,
Vis saxorum scinditur.

7. Brevi sepulcro clauditur,
Qui caelo non capitur,

Praeda vallatus divite
Victo mortis principe

Triumphali potentia
Surgit die tertia.

8. Reddite Christum, vigiles
Quem servastis, milites !
VYel mortuum ostendite,

Vel in vivum credite !
Cur gratis vera dicitis,
Empti falsa fingitis?

9. Mox intonat angelicus
Sermo mulieribus,

Apostolis ut dulcia

Haec deferrent nuntia:

In Gallilaeam pergite,
Ibi Christum cernite.

10. Iam regis Aegyptiaci

Servitute liberi
Post maris rubri transitum

Novum demus canticum,
Mortis soluti legibus

Christo consurreximus.

11. Colite, novi populi,

Rite pascha Domini,

Paschalis agni sanguine
Postes domus fingite,

Fermentum vetus pellite,
Azyma comedite.

12. Totis, Christe, visceribus
Tibi laudes reddimus,

Qui resurgens a mortuis
Ultra iam non moreris ;

Sit patri laus et parili
Decus omne flamini.