14. (10.) De sancto Eparchio.
Lectio.

Tempora prisca Deus decorans pie lampade celsus,

Celsus adauxit herus tempora prisca Deus.
Empta soli pretiis pollent ut stemmata gemmis,

Vota nitent meritis empta soli pretiis.
Mira studentque rosas quo pendere lilia gratas

Carpere caeligenas mira studentque rosas.
Principe principio sic cosmus splendet, et alto

Sancta micant deico principe principio.

Obtinuere chori patrum primordia celsi,

Anteriora boni obtinuere chori.
Recta canens hagio venit hinc vatum chorus agno,

Flamine fert populo recta canens hagio,
Agie, sancte, sacer, qui promunt ore potenter,

Rite boant iugiter: Hagie, sancte, sacer.
Primus apostolicus trabeatus et indusiatus

Considet et cuneus primus apostolicus.
Romphea colla vomens rubicundat martyres ardens,

Sanguine fusa videns romphea colla vomens.
Iam sacra virgineas excellit turma coronas

Famine perspicuas iam sacra virgineas.
Sancta sacrans digitis rutilat nam contio sacris,

Fercla cibi, calicis sancta sacrans digitis.
Commoriendo Deo gladios praetendit Olympo,

Pace quiescit humo commoriendo Deo.
Astra rubens superas, Eparchi sanctus, adornas

Consociusque beas, astra rubens superas.
Divitias Domini quia temnis munere Christi,

Nunc capis altithroni divitias Domini.
Es quoque pauperiem locuples sectatus ob arcem,

Vectus ad unanimem es quoque pauperiem.
Vir pius ac rutilis virtutum dote manebis,

Omnibus, alme, bonis, vir pius ac rutilis.
Stare sciens inopi miserator, mitis Eparchi,

Es vice paracliti, stare sciens inopi.
Dulcis amorque bonis renites dulcorus alumnis,

Adfluis ut genitis dulcis amorque bonis.
Erigis ob titulos morum procedere comptos,

Perpie, sanctificos erigis ob titulos.
Cerberus intremuit letoque datos tibi reddit,

Qui tua iussa facit, Cerberus intremuit.
Obtenebrata fugas palponibus ac via constas,

Fulgida lucis amas, obtenebrata fugas.
Rectius, arthetrici, salientes curritis ipsi,

Itis ad omne citi rectius, arthetrici.
Artubus unicolor data fit, cui morbus oletor,

Grex, cane Laus et honor, artubus unicolor.
Nacta super numerum meliusque caterva virorum

Agmina sunt medicum nacta super numerum.
Sic, Egolisma, places, tanto cum numine fulges,

Propter eum totiens sic, Egolisma, places.
Plusque vales meritis sancti quam turribus altis

Eparchii innumeris plusque vales meritis.
In fidei radiis adit hinc tumulum sibi quisquis,

Ops datur omnimodis in fidei radiis.

Egregia egregii qui visit membra patroni,

Vota feruntur ei egregia egregii.
Laetitiae socium socius deprehendit amicum,

Cor hilaratque pium laetitiae socium.
Aura polosa soma simul hac iubilant medicina,

Commoditate data aura polosa soma.
Mitis Eparchi, decens, Christo proferre clientes,

Sint bonitatis, ames, mitis Eparchi, decens,
Pontus et ima reos affligunt crimine mersos,

Quos videant superos pontus et ima reos.
Abside fulminea nimbis iactamur et una,

Nos tege sed galea abside fulminea.
Dicere nosque iuvat nebulones: Umbra recedat,

Gloria, lux veniat, dicere nosque iuvat.
En, dominare tuae propriae per cuncta catervae

Poscimus, ecclesiae, en, dominare tuae.
Crescat ut altus amor, societur caelicus ardor,

Esto salus et honor, crescat ut altus honor.
Exue nos maculis, renova virtutibus almis,

Alme, tuis meritis exue nos maculis,
Luxque tuis sophiae sit collatrix facis almae

Eniteat deicae luxque tuis sophiae.
Sontia, prava fuga, crudelia, mollia, pigra,

Lurida, pestifera, sontia, prava fuga.
Unanimes Domino compone perenniter alto,

Fac, bone, celsithrono unanimes Domino.
Scandere regna poli rogites nos, pastor Eparchi,

Consule macte gregi scandere regna poli.

Almus Eparchi Deo nimium quo splendide DaviD

Dignus eon, polica doctilogus patriA,
Ecce, tuam merito nequimus tangere laudeM,

Mire patrone mage, multisonaque chelE.
Almipotens tuus est cumulus nam laudis et aggeR,

Regnat ubique pia, rex, bene iustitiA.
Unde, pater, sua laus es, Eparchi beate, resultans

Sidereusque situ, stellifer in habitU.