61. (46.) In Laude sanctorum Apostolorum.

1. Spiritus alme, veni perfiando dindima nostra,
Ad nostrum votum, spiritus alme, veni,

2. Templa dicata tibi valeam quo extollere digne,
Laudibus exaltem templa dicata tibi,

3. Quae sine fine tenent caelorum gaudia celsa,
Gloria cum meritis quae sine fine tenent.

4. Ore Dei subolem prophetant iure prophetae,
Promit apostolicus ore Dei subolem.

5. Virginis hic genitus purgavit crimina mundi,
Tartara contrivit virginis hic genitus.

6. Damna poli Dominus restaurans morte perempta,
Sanguine restituit damna poli Dominus.

7. Rex pius ipse pios praecepit mergere lymphis,
Vexit ad alta poli rex pius ipse pios.

8. Semina parva sator cumulavit fructibus amplis,
Centuplicare dedit semina parva sator.

9. Effera corda nitent istorum flamine sancto,
Per varios flores effera corda nitent.

10. Lilia mixta rosis violaeque per aequora fragrant,
Sancta fides renitet, lilia mixta rosis.

11. Aurea regna poli dispensat Christus ubique,
Discipulis tribuit aurea regna poli.

12. Primitus alma fides per Petrum clarior exstat,
Eius odore nitet primitus alma fides.

18. Roma beata, nites Petri de corpore sancti,
Dogmate deque suo, Roma beata, nites.

14. Alma tropaea crucis pro Christo pertulit ille,
Vertice versus agit alma tropaea crucis.

15. Splendet ubique potens Paulus, mirabilis auctor,
Abscissus capite splendet ubique potens.

16. O veneranda nimis Petri Paulique decore,

Romula, quos retines, o veneranda nimis.

17. Facta salutis agens Iacobus per cuncta necatur,
Galiciae recubans, facta salutis agens.

18. Idola caeca colens Lycaonia, Armenia nec non
Vertitur ad Christum idola caeca colens.

19. Excoriate, nites in mundo, Bartholomaee,
Vertice praecisus, excoriate, nites.

20. Optima gesta canens Macedonia rite, Matthaeus
In Persis passus optima gesta canens.

21. In cruce, Petre, tuus germanus praedicat orbem,
Achaiam salvans in cruce, Petre, tuus.

22. Eripit ille Simon crucifixus famine salvans
Aegyptumque simul eripit ille Simon.

23. Milia multa virum Taddaeus contulit audax.
Pontus et Armenia, milia multa virum.

24. Dogmata multa tulit Thomas transfossus in orbe,
Persis et Medis dogmata multa tulit.

25. Se super astra ferens purgavit schisma Iohannes,
Quem tenet Ephesius se super astra ferens.

26. Fartus amore Dei lapidatur nempe Philippus,
Convertit Gallos fartus amore Dei.

27. Iacobus, ecce, nites, Domini sanctissime frater,
Praecipitatus obis, Iacobus, ecce, nites.

28. Inter apostolicos numeraris sorte, Matthia,
Iudaeam salvans inter apostolicos.

29. Uritur igne Dei Barnabas, dogmata dando,
Dumque crematus obit, uritur igne Dei.

30. Quam speciosa micas, Alexandria, sanguine Marci,
Constantina, simul quam speciosa micas !

31. Te retinendo nitet fulgens Bythinia, Luca,
Urbs quoque regalis te retinendo nitet.

32. Carmina parva dedit famulus pro munere supplex,
Parvus, iners strenuis carmina parva dedit.

33. Culmen apostolicum, dignanter suscipe munus,
Vota precesque pias, culmen apostolicum.