67. De sancto Kanuto Duce.

In 1. Vesperis.

Ad Magnificat.
A. Ave martyr, dux Danorum,

Ave, decus Daciae,
Cura causas sauciorum,

Cum sis pignus gratiae,

In nostra serie
Factis, verbis te sequamur

Et cum mentis acie,
Ne in limo infigamur

Vel labamur glacie

Vallis miseriae,
Sed te duce mundo calle
Transeamus ex hac valle

Ad superna

Et aeterna
Gaudia.

Ad Matutinum.
Invitatorium.

Veni, turba fidelium,
Dei adora filium,
Qui sanctum pro victoria
Aeterna ditat gloria.

In 1. Nocturno.

Antiphonae.
1. Beatus vir vere beatus,
Secus fontem transplantatus
Fructum profert irrigatus
In tempore suo.
2. Quare fremuerunt gentes
Innocentem persequentes ?
Infideles perierunt
Et cum Christo sunt et erant,
Qui confidunt in eo.
3. Exaudi, Deus, te orantem,
Nc contemnas deprecantem,
Cum exaudis et intendis
Et a malo nos defendis,
Sperabo in te, Domine.

Responsoria.

1. Ortum duxit dux Kanutus

de radice nobili,
Rex Ericus erat huic

propagator soboli,
Ex qua crevit regni salus

et libertas populi;

V. Stemmatis pompositas,
Morum elegantia
Et virtutum probitas
Sunt in hac substantia.

2. Quando fuit peregre

rex profecturus, honorem
Optavit proli,

sed onus non sustulit aetas,
Perpendens pater hoc,
compassio sanguinis urget;
V. Disponit cuidam

pueri committere curam.

3. Hoc statuto de Kanuto,
Quod pater disposuit,
Dicto vale ius regale

Tunc Haraldus suscipit,
Inchoato voto grato
Iter rex arripuit;
V. Mansit puer cum cognatis,
Et cum matre pater gratis
Peregrinus proficit.

In 2. Nocturno.
Antiphonae.

1. Cum invocarem, exaudisti
Invocantem nomen Cbristi
Et pro morte temporali
In spe vitae singulari
Constituisti me.

2. Verba mea sunt praecepta,
Morte vita est adepta,
Mors haec tuis grata satis,
Scuto bonae voluntatis
Coronasti nos.

3. Domine, Dominus noster es
Et sancti tui requies,
Coronasti hunc in caelis,
Quem honorat plebs fidelis.

Responsoria.

1. Iam flos purpureus
Spirat odore
Germine iustis,
Tempore messis

Dulcia grana
Ducit in altum;
V. Ut puer ille
Corpore crevit,
Crevit in illo
Gratia Christi.
2. Instat tempus iuventutis,
Fractus patet gratiae
Et salutis et virtutis,
Per quem iugo servitutis
Plebs privatur Daciae;
V. Constitutus est Kanutus
Dux in regno

Et princeps in acie.

3. Dux hic factus sui iuris
Diligit iustitiam
Et in rebus defensuris

Obtinet victoriam,
Perdit pravos a pressuris
Conservans ecclesiam,
V. Pauperibus pater ille pius
fit pastor egenis.

In 3. Nocturno.

Antiphonae.

1. Ecce, peccatores,
Falsi proditores

2. Domine, quis habitabit,
Et cum sanctis quis intrabit

In tua tabernacula?
Miles tuus et athleta,
Immortalis vitae meta

Inventus sine macula,
Non movebitur in aeternum.

3. Domine, in virtute tua
Sancti laetetur anima,
Pro cuius magna gloria
Psallemus virtutes tuas.

Responsoria.

1. Pacem Danis et paganis
Fidem sanctus contulit.

Quos a vanis et profanis

Ritibus recedere

Et in Christum credere
Compulit sub pacis foedere.
V. Duci Danorum

sub iure regio
Honorem exhibet

Sclavorum legio.

2. Felix iste vicibus

fruitur paternis,
Nam obstrusis undique

hostium cavernis
Dux dat uti Daciam

legibus modernis.
V. Providus in opere,

verax in sermonibus,
Vere Deo placuit

et dulcis hominibus.

3. Decus regni et libertas,
Pax, flos, fructus et ubertas,
Surdis aures das apertas,
Linguas mutis das disertas,
Claudis gressus, caecis visus,
Quisquis aeger est confisus

In te, sanus redditur;
V. Coetibus angelicis

iunctus super astra locaris
Atque tuis famulis

in terris auxiliaris.

In Laudibus.

Antiphonae.

1. In matutinis laudibus
Exaudiat te Dominus
Et sancti sui meritis
Nos servet a periculis
In longitudine dierum.

2. Iubilate et servite

Illi, qui est auctor vitae,
Ut sequentes sanctum ducem
Ducat nos ad veram lucem
Veritas eius.

3. Deus meus, Domine,

Labia mea laudabunt te,

Os iusti laude replebitur,

Os obstructum destruetur

Loquentium iniqua.

4. Benedicite regem iustitiae,
Quem secutus dux beatus
Est cum sanctis exaltatus
In saecula

5. Laudabunt omnes angeli
Nomen sanctum Domini,
Et mater ecclesia
Pro filii sui gloria
Laudat Dominum.

Ad Benedictus.

A. Benedictus Dominus,
Qui virtutis incrementum

Sancto duci contulit,
Unum granum grana centum

Moriundo protulit,
Ut non intret in tormentum

Patens peccatoribus,
Pie dux, hunc duc conventum

De peccati foribus
In viam pacis.

In 2. Vesp eris.

Ad Magnificat.

A. Dulcis martyr, dux Kanute,
Audi preces supplicum,
Duc nos de hac servitute,
Ne peccatum nos privatum
Sive scelus publicum
Ducat ad interitum,
Scd cum iustis et cum bonis
Terram repromissionis
Fac intrare
Et in ea perdurare
Per tuum sanctum meritum
In aeternum.