16. De sancto Gabriele.

Ad Matutinum.

Invitatorium.

Regi, qui verbo virginem
Salutavit Gabrielis,

Cantus promat dulcedinem
Psallentium vox fidelis.

In 2. Nocturno.

Antiphonae.

1. Vernans pudore lilium
Nubere recusavit,
Sed oraculum angelicum
Aliud indicavit.
2. Secretum legi consonum
Tunc Deus promulgavit,
Quando per suum angelum
Primum splendorem virginum
In matrem consecravit.
3. Conclusus est thalamus
Et contremuit locus,
Ubi archangelus Gabriel
Descendebat de caelo.

Responsoria.

1. Creaturis peccantibus
Universum multatur,
Hoc in sanctis agminibus
Secretum pertractatur,
Cum quo misit ad virginem
Rex caeli fortitudinem,
Ut mundus redimatur,
V. Summus apocrisarius,
Animus eius anxius
Pavescens meditatur.
2. Gabrielis oraculum

Ut virgo ponderavit,

Mox cordis habitaculum
Prudenter praeparavit,

Et totum virgo credidit,

Quod paranymphus edidit,
Nec quidquam dubitavit.
V. Concepit virgo regia

Ad credulitatem

Quae mundum illustravit.

In Laudibus.
Antiphonae

1. Mittit ad virginem

Non quemvis angelum,
Sed fortitudinem,
Suum archangelum
Amator hominis.
2. Magnum expediat

Pro nobis nuntium,
Naturae faciat
Ut praeiudicium
In partu virginis.

3. Accede, nuntia,

Dic Ave comminus,
Dic: plena gratia,
Dic: tecum Dominus,
Et dic: ne timeas.
4. Virgo, suscipias
Dei depositum,
In quo perficias
Castum propositum
Et votum teneas.
5. Audit et suscipit
Puella nuntium,
Credit et concipit
Et parit filium,
Sed admirabilem.