49. De sancto Iodoco.

In 1. Vesperis.
Antiphonae.

1. Exsultant caelestia
Iudoci praesentia,
Exsultent terrestria
Ipsius memoria.

2. Hic regum carbunculus,
Britannorum flosculus,
In Pontivo sedulus
Fuit Christi famulus.

3. Hic genus aquatile
Pascens et volatile
Asportatum altile
Supplantavit aquilae.

4. Panem dans per parvulas
Quattuor particulas
Pro singulis singulas
Recepit naviculas.

5. Te decet laudatio,
Qui punis raptores
Iudoci suffragio
Et sanas languores.

R. Puellam nativitas
Seu nativa caecitas

Aspectu frustravit,
Iudoci praeclaritas
Seu praeclara caritas

Illam illustravit.
O virum virtutis,
Cuius manibus ablutis
Aqua manus abluens
Fuit visum influens

Oculis delibutis.
V. Iudocus, Christi confessor,
Sit pro nobis intercessor.

Ad Magnificat.

A. Magnificat nobilitas

Iudocum confessorem,

Clarificat humilitas
Saeculi contemptorem,

Glorificat aeternitas
Dei contemplatorem,

In qua praestante Deo

Exsultabo cum eo

In salutari meo.

Ad Matutinum.
Invitatorium.
Regi regum iubilemus
Et Iudocum exaltemus.

In 1. Nocturno.
Antiphonae.
1. Beatus vir gloriae
Solium possedit,
Quia pestilentiae
Cathedra non sedit.

2. Quare comes fremuit
sanctum persecutus,
Non indigne doluit

languens surdis, mutis.

3. Exaudi nos, Domine,
Iudoci cultores
Et invictos sustine
Contra temptatores.

Responsoria.
1. Aspernator maiestatis,
Amplexator egestatis,
Confessor insignis,
Hortatur humilitatem.
Dehortatur vanitatem
Gestis laude dignis;
V. Ecce, magnus salvatoris
Imitator et calcator
Regalis honoris.

2. Ad caeli militiam

Regnumque supernum
Sic festinat, quod declinat
Parentelam regiam
Regnumque paternum;
V. Fugit regalis confessor,
Ne fiat regis successor.

3. Qui subiecto populo
Sub regali titulo

Posset dominari.
Solum portans baculum,
Non peram, non saeculum
Vult peregrinari;

V. Delectari potuit,
Sed in cruce maluit
Christi gloriari.

In 2. Nocturno.

Antiphonae.
1. Cum Iudoci sanctitas
Deum invocavit,
Telluris ariditas
Fontem eructavit.
2. Verba crucis vulnerant
Avem avolantem,
Asportatum liberant,
Necant asportantem.
3. Domine, magnalia
Miranda fecisti,
Qui tot animalia
Sancto subiecisti.

Responsoria.
1. Principatum deserens
Quaerit clericatum,
Omni regno praeferens
Christi famulatum,
O sanum palatum,
Cui sapit subiectio
Supra potentatum.
V. Insignitur igitur
Signo clericali,
Tonsura praeponitur
Coronae regali.
2. Honorans ecclesias
Dominum adorat,
Explorans reliquias
Gratiam implorat;
Cur tantum laborat?
Unguenta caelestia
In terris adorat.
V. Iste Christi peregrinus

Ad caelum currit festinus.
3. Cum sacerdos ordinatur,
Immolat et immolatur,
Nam similitudini
Mortis Christi Domini
Recte complantatur;

V. Id cuius argumentum
Manus Christi patet isti
Signans sacramentum.

In 3. Nocturno.
Antiphonae.

1. In Domino firmiter
Iudocus confidit,
Quia sensibiliter
Manum Dei vidit.
2. Domine, quis regiam
Habitat supernam?
Iudocus, qui gloriam
Contempsit paternam.
3. Domine, nunc muneras
Aeterna salute,
Quem prius armaveras
In tua virtute.

Responsoria.

1. Hic decorat et dulcorat

Comitalem curiam,
Se minorat, sed honorat

Totalem familiam,
Cunctis orat veniam,
Cunctis redolentiam

Virtutum vaporat.
V. Gaudet domus comitis,
Felix locus, quem Iudocus
Suis ornat meritis.
2. Iste fulgens moribus
Terram ornat floribus

Sicut lux solaris,
Per aspectum virtuosum
Mare reddens fluctuosum

Sicut lux lunaris.
V. In hac via prece pia

Nos, pater, irradia.
3. In desertis militat

Virtutum venator,
Sed in caelis habitat

Dei contemplator,
Quae Dei sunt, cogitat,
Quae sursum sunt, visitat,
Donec regnum captitat

Felix triumphator.

V. Bonum certamen certavit,
Fidem vivam conservavit,
Cursum consummavit.

In Laudibus.
Antiphonae.

1. Dominus recte regnavit,
Cui Iudocus militavit,
Nam illius gratia
Iste vicit vitia.

2. Iubilate, sancti, Deo
Pro Iudoci mausoleo
Revelato parvulis
Non sine miraculis.

3. Deus, iste vigilavit
Et vigiles excitavit,
Quando luminarium
Accendit senarium.

4. Benedicite ludocum

Frequentantes eius locum,
Nam oppressos liberat,
Quos hostis oppresserat.

5. Laudate Deum de caelis,
Quoniam servus fidelis
Duplicans quinarium
Intravit in gaudium.

Ad Benedictus.

A. Benedictus Dominus,
Viatorum terminus

Et fructus laborum,
Qui videbat eminus,
Modo videt comminus

Hic flos confessorum;

O rex angelorum,
Trahe nos tractu veloci
Meritis sancti Iudoci

Ad regna polorum.

Per Horas.

Ad Primam.

A. Prima sancti laus: regalem
Parvipendit gloriam;
Secunda: terram natalem
Et carnalem copiam.

Ad Tertiam.
A. Tertia: corpus castigat;
Quarta: Christo militat;
Quinta: pugnantem fatigat,
Triumphantes visitat.

Ad Sextam.
A. Sexta: virtutes registrat
In medullis intimis;
Septima: Deo ministrat,
Et octava: proximis.

Ad Nonam.
A. Nona: lucet; sed draconem
Conculcat, laus decima;
Undena: calcat leonem;
Dormit, duodecima.

In 2. Vesperis.

Antiphonae.

1. Virtus temperantiae
Sanctum adornavit,
Quae concupiscentiae
Motus mitigavit.

2. Virtute prudentiae
Sanctus coruscavit,
Quando vanae gloriae
Veram praeoptavit.
3. Servavit iustitiam
Christo militando,
Gratis datam gratiam
Gratis ministrando.
4. Virtus fortitudinis
Fecit confessorem,
Hostilis certaminis
Virilem victorem.
5. Bonum est in famulo
Regem honorare,
Quem fecit in saeculo
Signis coruscare.

Ad Magnificat.
A. O pater sancte Iudoce,
Dulcis in memoria,
Sed cum Christo iam perennis

Dulcior in gloria,
Quibus ipse iucundaris

Inter caeli incolas,

Fac, ut ad caelestis agni

Admittamur epulas.

A 3 lautet in B:

Domini possessio
Dicendus est locus,

Quem suo praesidio
Tuetur Iudocus.

R 3 lautet in B:

Iudocum in varia
Cellarum cellaria

Christus introduxit,
Ubi multifaria
Virtutum donaria
Eidem influxit;
V. Pinguescunt desertae cellae
Fluentes lacte et melle.

Ad

Magn. A lautet in B:

Iudoce, pater inclite,
nos serves a ruina

Nosque frui facias
gratia divina.