6. De ss. Felice et Adaucto.

In 1. Vesperis.
Ad Magnificat.

A. O fortunata unio,
Vere sacrata passio,
O martyrum condicio
Iuste laurearis

Super caelesti solio,
Iam quorum de collegio
Totalis pacis visio

Gaudet in praeclaris,
Quos nostra laudat contio,
Ut horum patrocinio
Iungamur contubernio

Perpetis solaris.

A d Matutinum.
Invitatorium.

Genus David et radicem
Adoremus Dominum,

Qui Adauctum et Felicem
Regnum in diutinum

Ad summum vexit stabile

In lumen admirabile.

In 3. Nocturno.
Responsoria.

1. Per orbitam tyrannide
Barbariei rabidae

Ingruente saeva
Ob Augustorum monita
Sanctorum in deposita

Fidei primaeva,
Felix sacerdos capitur,
Libare tus praecipitur

Serapis in aede;
Insufflans is in idola,
Quae ruunt ut malivola

Spiritali caede.
V. Libere praecelsus egit

Rex Deus ultionum
Et in humile redegit

Sublime regionum.
2. Adductus hinc ad statuam
Mercurii dolifluam

Compari vi fecit
Et statuam Dianicam
Virtutem per deificam

Tertio deiecit;
Membratim in eculeo
Nam tortus, sed aethereo

Solatio potitur,
Poenarum nec fastigio
Terretur nec supplicio

Nec minis demolitur.
V Leges regum aspernata,

Caesarum decreta,
Mens in Christo solidata,

Caritate freta
Blandis nec mulceri
Poterat nec teri.

3. lubet Caesar, ut moechetur

Arbore blasphema,
Is sed Christum confitetur

Flagrans ad suprema,
Fusa prece subsannavit

At arboris profana,
Quam radicitus prostravit

Fides diaphana;
Flavit auster et munivit

Hunc, qui forma pari
Templum funditus contrivit

Profanum cum altari.
V. In externis ab externo

Penitus abstractus,
Emergenti de superno

Iubilo compactus.

In Laudibus.
Antiphonae.

1. Fana cernens iudex spreta

Deorum multiformia
Et favillitus deleta

Vocarique daemonia,
Cordis furit per secreta

Repletus idolatria.
2. Pro deorum ultione
Iussit aemulus mucrone

Sanctum decollari,
Canibus et lupis feris
Gestis pullulans sinceris

Corpus praesentari.
3. In medium prosiliens

Vir quidam hoc perspiciens

Christi fidem gestans,
Corde confitens et ore
Sese Christianum fore,

Idola detestans.
4. Claritate venustantes

Luminis divini,
Sanctitatis osculantes

Osculo se bini,
Decollantur triumphantes

Vitae iam vicini,
fi. Huius nomen ignoratur,

Sed a fidis testibus

Hinc Adauctus appellatur,
Qui Felicis passibus

Auctus ultro copulatur
Iunctus in caelestibus.

Ad Benedictus

A. Insignitus circumfultus
Venustate Dei vultus

Uterque in aethereo,
Quorum pios per singultus
Homo terreus sepultus

Fidelium a cuneo,
Quos effodere tumultus
Paganorum dum insultus

Conantur ab areo,
Hoste sunt erepti
Inferos adepti.

In 2. Vesperis.

Responsorium.

R. O felix quam felicitas,
Intermina fruitio,
O perpes generositas,
Quam huius vitae spatio
Feliciter peracto
Felici in empyreo

Perenniter amplecteris
Fuso cruore roseo

Qua caelitus perfrueris,
O Felix, cum Adaucto.
V. Quam generosa civitas

Cunctorum ut laetantium
Lucis in te aeternitas,
Virtutum urbs caelestium.