1016 Acta Apostolicae Sedis - Commentarium Officiale

SANCTI GERMANI

Beatificationis et Canonizationis Ven. Servae Dei Mariae Elisabethae Turgeon

Fundatricis Congregationis Sororum Dominae Nostrae Sancti Rosarii de Sancto

Germano († 1840-1881)

DECRETUM SUPER MIRACULO

Venerabilis Serva Dei Maria Elisabetha Turgeon die 7 mensis Februa-

rii anno 1840 Bellomontii prope civitatem Lévis in Quebecensi Canadiae

regione nata est. Licet infirma affecta sit valetudine, cum parvo coetu iu-

venum mulierum institutionis muneri Maria Elisabetha vacavit et, instante

Episcopo Sancti Germani, Congregationem Sororum Dominae Nostrae a

Rosario de Sancto Germano fundavit, cuius Superiorissa dein electa est.

Insequenti anno, tres, quae dicuntur, « missiones » in miserrimae pauper-

tatis locis atque liberam scholam in eodem vico Sancti Germani aperuit,

ubi novitiae sese ad magisterium adimplendum pararent. Caritas equidem

virtus fuit vitam eius quasi conglutinans: vere in omnes, enim, dilectionem

suam convertit ac singulari cura in socias Sorores, quibus tamquam mater

fuit summae curae ac benignitatis dives, quibuscum squalorem locorum

rigoremque hiemis communicavit. Infirma eius valetudo haud praepediit,

quin Serva Dei missionem suam fidenter usque ad natalem in Christo

perseveraret, qui die 17 mensis Augusti anno 1881 occurrit.

Summus Pontifex Franciscus die 9 mensis Octobris anno 2014 decre-

vit eam virtutes theologales, cardinales iisque adnexas in modum heroum

coluisse.

Beatificationis respectu, Causae Postulatio iudicio huius Congregationis

de Causis Sanctorum assertam subiecit miram Venerabilis Servae Dei inter-

cessioni tributam hominis cuiusdam sanationem, quae in Canada occurrit.

Hic, enim, mense Decembri anno 1991, triginta quinque circiter annos

natus, severa sive rubrorum sive alborum globulorum sanguinis depra-

vatione correptus est cum ingenti corporis ponderis imminutione. Cui in

valetudinario recepto innumerarum mutationum ossium cellularum medici

rettulerunt praesentiam. Tantis in difficillimis adiunctis, aegrotorum vale-

tudinarii minister, qui et diaconus permanens erat, eum adhortatus est, ut

ad divinum confugeret auxilium per eiusdem Servae Dei intercessionem,