Acta Francisci Pp. 1105

II

Servae Dei Maria a Monte Serrato (in saec.: Iosepha Maria Columnaris García Solanas) et VIII Sociae Sorores professae Instituti Minimarum Discalceatarum S. Francisci de Paula necnon Lucretia García Solanas, christifidelis laica, inter Beatos Martyres recensentur.

FRANCISCUS PP.

Ad perpetuam rei memoriam. - « Quemadmodum communicatis Christi passionibus gaudete » ( 1 Pe 4, 13).

Haec exstitit experientia quam vixerunt novem moniales professae ex Instituto Minimarum Discalceatarum Sancti Francisci de Paula, e Monas- terio Barcinonensi, necnon vidua laica quae easdem comitabatur.

Cum anno MCMXXXVI immanis coorta est religiosa insectatio, Servae Dei praemonitae sunt de instanti ac gravissimo cui occurrebant periculo, qua de re coactae sunt ad dispersionem ita ut, per coetus compositae, refugium tutum quaesiverint.

Haec monialium communitas, cui praeerat soror Maria a Monte Serra- to, dum vespere diei XXIII mensis Iulii anno MCMXXXVI mariale recitabant rosarium, viderunt fores domus inopinate apertas esse, ubi conveniebant, necnon persecutores ingredi, manuballistulis ignivomis, lungis instrumentis acutis et pugionibus instructi, sororibus metum incutientes ad inquisitionem exsequendam. Omnibus rebus privatae sunt et obstrictae ad sese in serie disponendas. Deinde, omni dempta humana consideratione, in autocine- tum onerarium tali vi conscendere sunt coactae ut quaedam ex illis ossium fracturam subirent. Deinde in ergasterium laterarium sunt evectae, et illic oppugnatores corpora earum omni defensione carentium trucidarunt pugio- nibus utentes et armis acutis, easque tandem ignivomis necaverunt armis. Ex inquisitione, posterius facta, detectum est iuniores sorores aliasque in cruribus, in pectore et in abdomine esse percussas.

Simul cum his monialibus Minimis, martyrio quoque occubuit quaedam mulier vidua, unius ex monialibus soror germana, quae sociam praestabat operam in cella ostiariae et ab exteris servitia pro monasterio exsequebatur.

Hae Servae Dei Barcinone martyrio vitam consummarunt die XXIII mensis Iulii anno MCMXXXVI, quarum nomina, una cum terra patria et die nativitatis,

statim exhibentur.