Acta Apostolicae Sedis - Commentarium Officiale974

priusquam duceretur ad locum supplicii, suis in carcere sociis affirmavit quod

pro ipsis intercederet et pro omnibus, immo pro persecutoribus, oraret.

Deinde benedixit eos. Sereno vultu, uti firmae fidei et inconcussae spei

pignore, accessit ad patibulum erectum in platea municipii Constantiensis,

coram multitudine, quae mutescens et commota contemplabatur hunc

iuvenem sacerdotem summa animi pace morti obviam euntem.

Servus Dei capite truncatus est die 13 mensis Octobris anno 1793.

Extrema eius verba audita sunt a quodam teste, tunc puero decem annos

nato, qui postea rettulit ea quae Servus Dei paulo ante mortem pronuntia-

verat: «Deus meus, in manus tuas commendo spiritum meum. Precor te pro

restauratione et tutela sanctae Ecclesiae. Da veniam, quaeso, inimicis meis ».

Corpus eius sepultum est in Constantiensi coemeterio Sancti Petri. Statim

Servus Dei veneratione est honestatus uti martyr Veritatis.

Anno 1922, quo incohati sunt diversi Processus dioecesani de martyribus

ob eversionem in Normandia, Causa Petri Hadriani Toulorge speciali pondere

digna visa est. Quapropter, a die 26 mensis Iulii ad diem 4 mensis Octobris

anno 1928 apud Curiam dioecesanam Constantiensem-Abrincensem instruc-

tus est Processus Ordinarius Informativus, quem secuta est a die 16 mensis

Novembris anno 1995 ad diem 29 mensis Iunii anno 1996 Inquisitio dioece-

sana suppletiva circa assertum martyrium et famam martyrii Servi Dei,

quandoquidem eius Causa seiuncta erat a ceteris die 24 mensis Aprilis anno

1995: quorum iuridica validitas approbata est per Decretum die 8 mensis

Maii anno 1998 vulgatum. Die 5 mensis Decembris anno 2000 habita est

Sessio Consultationis Historicae ac die 15 mensis Iulii anno 2010, positivo

cum exitu, Congressus Peculiaris Consultorum Theologorum. Die 1 mensis

Martii anno 2011 Purpurati Patres et Episcopi in Ordinaria Sessione congre-

gati, excipientes relationem Ponentis Causae, Exc.mi D.ni Iusti Mullor

Garcı́a, Archiepiscopi titulo Volsiniensis, agnoverunt mortem Servi Dei ve-

rum fuisse martyrium, quod in odium fidei ipse pertulit atque veluti donum

gratiae vixit et accepit.

Facta demum de hisce omnibus rebus Summo Pontifici Benedicto XVI

per subscriptum Cardinalem Praefectum accurata relatione, Sanctitas Sua,

vota Congregationis de Causis Sanctorum excipiens rataque habens, hodierno

die declaravit: Constare de martyrio eiusque causa Servi Dei Petri Hadriani

Toulorge, Sacerdotis Professi Candidi et Canonici Ordinis Praemonstratensis, in

casu et ad effectum de quo agitur.