Acta Apostolicae Sedis - Commentarium Officiale864

suffecta est. Eius spiritalitatis fundamentum Benedictina fuit Regula, quae

ad sanctitatis viam spiritalem aequabilitatem atque asceticam moderatio-

nem posuit. Propter monacharum auctum numerum, praesertim ipsius ob

praestantem effectum, anno ferme MCL monasterium condidit in colle

Rupertsberg, prope Bingium, in quod cum viginti sororibus se contulit

atque anno MCLXV alterum in oppido Ibingensi, in adversa Rheni ripa,

constituit. Utriusque monasterii fuit abbatissa.

Intra claustri muros spiritus corporisque bonum curavit sororum, pecu-

liarem in modum vitam communem, cultum et sacram liturgiam colens.

Extra studiose dedit operam ut Christiana fides atque pietas roborarentur,

Catharorum haeresis inclinationes arcendo, Ecclesiae reformationem per

scripta et praedicationem promovendo, disciplinam et cleri vitam in melius

vertendam iuvando. Decessorum Nostrorum Hadriani IV et postea Alexan-

dri III rogatu, Hildegardis frugiferum apostolatum egit - quod illis tempo-

ribus raro usu venire solebat - quaedam itinera ab anno MCLIX suscipiens, ut

vel in publicis plateis et in nonnullis cathedralibus templis concionaretur, ut

accidit inter alia Coloniae, Treviris, Leodi, Mogontiaci, Metae, Bambergae,

Herbipoli. Alta eius mystica experientia necnon scripta, quoad cultum et

spiritalitatem, cum fidelibus tum eminentibus hominibus eiusdem aetatis

multum profuerunt, efficaci erga theologiam, naturae rerum scientias ac

musicam inducta renovatione.

In Hildegarde Bingensi inter doctrinam et cotidianam vitam maxima

reperitur congruentia. Quas summopere exercuit virtutes firmiter cum

radicibus Bibliorum, liturgiae et patrum eae copulantur, quas sub Regulae

Benedicti lumine prudenter perfecit. Suum acre ingenium suasque dotes re-

rum caelestium intellegendarum cum continuata oboedientia, simplicitate,

caritate et hospitalitate coniunxit. Suis compluribus scriptis operam dedit

ut tantum divina revelatio demonstraretur atque Deus suo in limpido amore

cognosceretur. Hildegardis doctrina tum altitudine rectitudineque eius inter-

pretationum praestat tum novitate eius visionum, quae historiae illius tem-

poris fines excedunt: eius textus qui vera « intellectus caritate » imbuuntur,

peculiarem viriditatem et vigorem in contemplando mysterio Sanctissimae

Trinitatis, Incarnationis, Ecclesiae, humanitatis, rerum naturae, uti Dei

creaturae aestimandae servandaeque, secum ferunt.

Morbo aestate anno MCLXXIX correpta, Hildegardis, sororibus circumdata,

sanctitatis fama perfusa in monasterio Montis Ruperti apud Bingium die XVII

mensis Septembris anno MCLXXIX obiit.