Acta Apostolicae Sedis - Commentarium Officiale600

atque religiosa nuncupavit vota. In custodia Montoro die 22 mensis Iulii anno

1936 est occisus, aliquot menses ante novitiatus conclusionem.

Duobus in conventibus, Montoro et Hinojosa, Servus Dei pater Carmelus

Moyano eiusque novem confratres exemplarem vitam conduxerunt et

vixerunt, propensam ad orationem, operam evangelizationis atque caritatis

exercitium. Ii prae persecutione numquam haesitaverunt, fideles Christo

manentes et propriae condicioni credentium et religiosorum. Eiusmodi

firmitas Servos Dei disposuit ut martyrium amplecterentur.

Propter famam martyrii, quae statim diffusa est inde a tempore eorum

mortis, a die 28 mensis Februarii anno 1958 ad diem 13 mensis Decembris

anno 1960, apud Curiam Episcopalem Cordubensem, Processus Ordinarius

actus est, et, a die 26 mensis Martii ad 27 diem mensis Aprilis anno 1960,

apud Curiam Archiepiscopalem Caracensem in Venetiola, Processus Rogato-

rialis est instructus. Quorum Processuum iuridica validitas a Congregatione

de Causis Sanctorum per Decretum die 1 mensis Iunii anno 1990 est

recognita. Parata Positione, de asserto martyrio Servorum Dei, ad normam,

disceptatum est. Die 5 mensis Decembris anno 2008 habitus est Congressus

Peculiaris Consultorum Theologorum, cuius positivus exitus in Sessione

Ordinaria die 13 mensis Aprilis anno 2010 est confirmatus, in qua Patres

Cardinales et Episcopi, audita relatione Ponentis Causam, Excellentissimi

Domini Laurentii Chiarinelli, Episcopi Viterbiensis, agnoverunt Servos Dei

martyrium in odium fidei sustinuisse.

De hisce omnibus rebus, referente subscripto Archiepiscopo Praefecto,

certior factus, Summus Pontifex Benedictus XVI, vota Congregationis de

Causis Sanctorum excipiens rataque habens, hodierno die declaravit: Consta-

re de martyrio eiusque causa Servorum Dei Carmeli Mariae Moyano Linares et

IX Sociorum ex Ordine Carmelitarum, in casu et ad effectum de quo agitur.

Hoc autem decretum publici iuris fieri et in acta Congregationis de Causis

Sanctorum Summus Pontifex referri mandavit.

Datum Romae, die 1 mensis Iulii A.D. 2010.

e Angelus Amato, S.D.B. Archiep. tit. Silensis, Praefectus

L. e S.

e Michaël Di Ruberto Archiep. tit. Biccarensis, a Secretis