203. De sancto Augustino.

1 a. Augustino laudes demus,
Augustini qui gaudemus
Meritis et gloria;

1 b. Clerus ipsum veneratur,
Per quem cleri sublimatur
Dignitas et gratia.

2 a. Hic est Augustinus pater,
Quem seductum pia mater
Et secutum devia

2 b. Post innumeros errores
Ad virtutum traxit mores
Per multa suspiria.

3 a. Hic est ille vir beatus
Die nocte meditatus
In lege dominica,

3 b. In quo veritas laetatur,
Per quem semper obpugnatur
Pravitas haeretica.

4 a. Iste pater clericorum,
Forma regularium
Et exemplar est cunctorum
Sub norma degentium ;

4 b. Iste rivus sacri fontis
Rigatoris mentium,
Hic est collis eius montis,
Qui mons exstat montium.

5 a. Ecce, palmes vitis verae

Multum fructum adferens ;

5 b. En, Israelita vere

Nullum dolum proferens.

6 a. Qui de servo fit amicus,
Quem non laedit inimicus
Qualibet iniuria;

6 b. Qui talentum duplicavit,
Duplicatum reportavit
In regis praesentia.

7 a. Tu vectis imputribilis,
Intromissus in circulis,
Ut portes arcam foederis,

7 b. Et mensa reflexionis,
Divini panis fertilis,
Id est verbi et operis.

8 a. Tu fiala, tu cyatus
Candelabri, tu calamus
Auri fulgore rutilus,

8 b. Et tuba tabernaculi

Convocans coetum populi
Audire iussa Domini.

9 a. Tuque reclinatorium
Salomonis mirificum
Et sedes sapientiae,

9 b. Tu columna argentea
Sustentans aedificia
In figura ecclesiae.

10 a. Tu lapis aedificii
Illius Salomonici,

Hoc est templi dominici,

10 b. Qui quadratus ad regulam
Perornas Christi fabricam,
Catholicam ecclesiam.

11a. Pane vitae satiatus,
Salutaris debriatus
Aqua sapientiae.

11b. Iam per terras veneraris
Et in caelis adornaris
Stola innocentiae.

12 a. O caeli luminarium

Et vas sacrarum artium,
Doctor doctorum omnium,

12 b. Fer clero patrocinium,
Sis clericis refugium,
Ne fiant in opprobrium.