16. De Tunica Domini.

1 a. Exultando sacras laudes
Corde pio Trevirenses
Promant Christo Domino,

1 b. Cuius habent per Helenam
A supernis ordinatam
Sacrosanctam tunicam.

2 a. Hanc prophetae praedixerunt
Et in scriptis reliquerunt
Profuturam posteris,

2 b. In ovili Trevirorum
Maximilianus horum
Protector et dominus.

3 a. Sanctum nactus propositum

Iubet quaeri depositum

Tunicae dominicae.

3 b. Praesul fide loricatus
Paret Caesari Richardus
Quaerens [hanc] magnifice.

4 a. Tunicae ipse thesauro
Id vento offert populo
Contuendum inclite;

4 b. Fidei sinceritatem

Offert cunctis, sanitatem
Languidis a crimine.

5 a. Invisuri tantum pignus
Vitiorum primo limus
Deponatur animae,

5 b. Nam reticulata sacris
Est almae virginitatis
Manibus christiferae.

6 a. Corpus Christi sacrosanctum
Tangit pignus hoc et tantum
Crescens nutu flaminis,

6 b. Sanat aegram per virtutem,
Vi nervorum dissolutam
Fluxum stringens sanguinis.

7 a. Tantam ergo Christi vestem
Morbum carnis atque pestem
Mentis avertentem omnes
Collaudantes veneremur
Sinceris affectibus.

7 b. Ipsa enim exstat vestis,
In qua Christus crucifixus
Et ad mortem usque lassus
Vidit sortem iuxta scripta
Mitti a militibus.

8 a. Per quam sacra conservetur
Ecclesia et laetetur
Pace freta, Deo detur
Honor, Deus et precetur,
Schismata ne irruant.

8 b. Fili Dei, te laudamus,
Confitemur, adoramus,
Tunica nam tua dignos
Nos fecisti, sublimandos
Nunc et in perpetuum.