75. In Nativitate BMV.

1 a. Vale, vellus Gedeonis
Et celatum Salomonis
Auro fulgens ferculum,

1 b. Stella maris mundo lucens,
Virgam Iesse stirps producens,
Novum dans spectaculum.

2 a. Stella terris inest una,
Cuius simul sol et luna
Stupent pulchritudinem,

2 b. Stupet caelum decus terrae
Stupet terram sidus ferre,
Stupet versum ordinem.

3 a. Est naturae ius mutatum,
Est in terra sidus natum,
Quod solem parturiat,

3 b. Qui splendorem specialem,
Qui calorem dat vitalem
Et occasum nesciat.

4 a. Admirantur universa,
Quod e terra vice versa
Caelum lux irradiat,

4 b. Obstupescit et natura,
Quod creatur creatura,
Quae creatum pariat.

5 a. Vale, nascens stella maris,
Quae dux esse comprobans
Et spes vitae singularis
Naufraganti saeculo;

5 b. Lux virtutis, via morum,
Quae nescisti viri thorum,
Tuo digne rex caelorum
Prodit tabernaculo.

6 a. Qui per septiforme donum
Sibi fecit ex te thronum,
Nullum tale vel tam bonum
Sculpsit sapientia;

6 b. In te candor castitatis,
In te fulgor caritatis,
Thronus summae maiestatis
Ex hac fit materia.

7 a. Absque manu regis visus
Ex te lapis est excisus,
Virgo, nostri causa risus,
Flos convallis, paradisus,
Arbor aromatica;

7 b. Tu decorem induisti,
Tu plus sole refulsisti,
Cum, beata, nubem Christi
Tuae carnis concepisti
Polymita tunica.

8 a. Mater, pacem da benigna,
Virgo, viro nos consigna,
Quem circumdas alvo digna,
Ne nos hostis ars maligna
Fallat aut versutia;

8 b. Porta patens regi soli,

Per quem cadunt hostis doli,
Tu nos offer tuae proli,
Quo cum ipso summo poli
Perfruamur gloria.