172. De Omnibus Sanctis.

1. Immense omnium
rex angelorum
et hominum, sedulo
cui oboedit
orbis machina,

2 a. Famulatur aetheris
terrarumque
latitudo liquidi
necnon maris
cuncta fluenta,

2 b. Quem oportet gloria,
laus et honor,
salus, vita, veritas;
qui diceris
pacis speculum,

3 a. Clementi aure supplicum
tuorum
carminula
inter superna
modulamina
concipe,
licet non sint
digni servuli.

3 b. Concurrat universitas
gentium
collaudando
immensitatem
patris aeterni,
geniti
spiritusque
sancti gloriam.

4 a. Novenos qui caelo
choros mire
ordinavit
obsequio,
discretos
caritatis honores
pulchre tenentes.

4 b. Haec festa omnium
sanctorum sunt,
sapientia
quos a primo
splendore

mundi fecit usque in
finem saeculi.

5 a. Hinc celsorum
patrum colenda
est nobis probitas,
patriarchae vocati,
gloriosi qui patres
perditi
generis humani.

5 b. Prophetalis
ordo, futura
praedicens, virginis
de impolluto templo
Christum olim nascendum
spiritu
repletus canebat.

6 a. Lumina

vos bis sena

mundi, amici Christi,

apostoli,

fundamen ecclesiarum,

nostrae vitae favete.

6 b. Martyrum
purpuratae
phalanges, nos beati
nunc cruoris
flumine a criminibus
apud Deum solvite.

7 a. O doctores strenui
et confessores pii,
invisibili
hosti rebelles,
viles iuvate.

7 b. Mater virgo Maria,
turba virginum sancta,
miseris assis
clemens et nostri
pia adiutrix.

8 a. O sancti spiritus,
interdum angeli
vocati,

indignos precibus
vestris semper firmate.

8 b. Te, Christe, poscimus,
redemptor optime,
ne sinas

creaturam perire,
sed da tecum regnare

9. Et cunctos sanctos
pro propriis
fac orantes.