20. De Corona Spinea.

la. Iam caelorum hierarchia
Dulcisona melodia
Psallat regi gloriae,

1b. Psallat omnis creatura
Laureato iam praedura
Corona victoriae.

2 a. Sion nata, fac egressum,
Diadema vide pressum
In caput dominicum,

2 b. Quo synagoga crudelis
Mater illud spinae telis
Coronavit caelicum.

3 a. Immundatur sacra cutis,
Maculatur foedis sputis
Clara regis facies,

3 b. Flagellatur dulcis Iesus
A Pilato, ut sic caesus
Zeli cedat rabies.

4 a. Exiit hinc ferens sertum
Diris sentibus refertum
Manibus sacrilegis,

4 b. Exclamavit tunc proterva
" Crucifige hunc" caterva,
"Hunc perversorem legis."

5 a. Salve, lignum memoria
Dignum, per quod scoria
Cessavit protoplasti,
Cui gyro orbis fasti
Nullum coaequatur.

5 b. Sit benedicta florida
Corona, quae rorida
Fit virgineo rore,
Christi nobili cruore,
Per quem fecundatur.

6 a. Caelum stupet, terra tremit,
Quod arando spinam premit
In sacratum lilium,

6 b. Eclipsavit lux solaris,
Ubi sensit in amaris
Poenis Dei filium.

7 a. Telluris apertura
Peteramque scissura
Hunc Deum est fassa,

7 b. Sed nefanda natio,
Cuius caeca ratio,
Huic non est compassa.

8 a. Haec attende, credula
Gens, et voce sedula
Clama cum propheta:

8 b. Quae reddam vota pia
Deo, qui ludibria
Tulit sine meta?

9 a. Pietas Domini multa,
Nam rogat, ut sit inulta
Tortorum malitia;

9b. Quis audivit tale donum?
Redditur pro malo bonum,
Pro bono supplicia.

10 a. Fili Dei, mitis agne,

Regum dominator magne,
Peccantes non despice,

10 b. Obscurato pridem velis

Vultu, nunc fulgente caelis
Plasma tuum respice.

11a. Te precamur, nobis praesta,
Ut coronae tuae festa
Recolamus cernui,

11b. Recolentes, pater, nosce,
Libro vitae nos deposce
Aureola perfrui.

12 a. O cunctorum causa prima,
Summa gubernans et ima,
Fac nos te diligere

12 b. Fide recta, spe perfecta,
Ut cum turba praeelecta
Semper queamus vivere.