159. De beata Maria V.

1a. Salve, virga stirpis Iesse,
Per quam fecit Deus esse
Salutis remedium,

1b. Novo more salutata
Genuisti fecundata
Dei patris filium.

2 a. Sol de stella prodiit
Et in sole posuit
Suum tabernaculum,

2 b. Terra vermem edidit,
Per quem Ionas perdidit
Et deflet umbraculum.

3 a. Te prophetae praedixerunt,
Patriarchae signaverunt
In figuris dogmatum,

3 b. Apostoli crediderunt
Et gentibus effuderunt
Lumen evangelicum.

4 a. Cum summo gaudio
In hoc tripudio
Regis et filio

4b. Precamur, domina,
Dele peccamina,
Solve discrimina.

5 a. Rubus ardere cernitur
Rubi virente folio,
Virgo mater efficitur
Salvo pudoris gremio.

5 b. Novus lucifer oritur

Mundi finito termino,
Novo risu perfruitur
Sara nascente filio.

6 a. Novi partus gaudium
Prodiens de virgine
Purgat Adae filium
Veteris caligine.

6 b. Terra pandit lilium

Nullo culta vomere,
Virgo parit filium
Sine viri semine.

7 a. Felix puerpera

Dei et hominis,
Audi suspiria

Gementis hominis
Et redde prospera.

7 b. Confer solacium,

Succurre miseris,
Quae spes fidelium
Et salus diceris,
Intende, propera.

8 a. Placa mare, maris stella,
Via caeli, regis cella,
Vitae cursum militarem
Duc ad portum salutarem
Spei certitudine.

8 b. Regem natum interpella,

Nos ut salvet a procella

Vitae servans puritatem,

Dans antiquam dignitatem

Fracto mundi turbine.

9 a. O Iesu dulcissime,
Sanctorum mitissime,
Piae matris unice,

9 b. Preces nostras hodie
Cum Maria virgine
Miseratus respice.

10 a. Fac in beato munere
Et te solum diligere
Et vitae sequi praemia
Tua ducente gratia,

10 b. Ut digni tuis laudibus
Iuncti choris caelestibus
Pace fruamur sedula
In saeculorum saecula.