174. De Omnibus Sanctis.

1. Sancta ac digna
die sacrata
sunt recolenda
mysteria.

2 a. Propterea
Christo debita
concine, cohors, cantica,

2 b. Quae dicata
Dei vivida
sanctis sunt iam memoria.

3 a. Nostris posita persistat
Maria sensibus, domina
pia mundi et lucerna,

3 b. Quae intacta virgo celsa
creatorem intra gestavit
sua Dominum viscera,

4 a. Vitae atria

per lignum perdita
vetitum et ipsa
reddit prole sua.

4 b. Ipse agmina
restaurat supera,
effectus nam nostra
Christus factura.

5 a. Pars laetare dena,
ultima creata,
lymphis sanctis perfusa,
tibi quia dantur aethera,

5 b. Ubi lux immensa
et virtus beata,
ubi est corona
sanctis decenter praeparata.

6 a. O quam lucida
iustorum loca
et felicia regna
illis promissa!

6 b. Ibi organa
sonant inclita,
cantica praedulcia
necnon et nova.

7 a. Ibi est angelica
et archangelica,
principum eximia
et caterva infinita,

7 b. Virtutum cohors pulchra,
potestatum praediva,
dominatio magna
atque thronorum munia.

8 a. Cherubim multa
ac flaminum sacra
et ignea

Seraphim dantia
laudum munia,

8 b. Michael fortissima
et Gabriel summa
pneumata,

Raphael praestantia
ac dignissima.

9 a. Haec nos militia

cum prophetis pretiosa
cum cuncta martyrum nitida
et virginum turma,

9 b. Apostolorum gloriosa,
patriarcharum clara,
confessorum vera
et contio benigna,

10. Per haec saecla
acquirere aeterna
protegant veneranda
dando nobis iuvamina.