151. De beata Maria V.

1 a. Post partum,
in partu et ante
mater viri nescia,

1 b. Electa,

dilecta dilecto,
ave, plena gratia.

2 a. Ave, decus orbis terrae,

Cui salutem mundi ferre

Mundi factor contulit,

2 b. Virga florens, sed non arens,
Virgo prolem vera parens
Quando mire protulit.

3 a. Flos convallis es, Maria,
Flos in spinis sine spina,
Terra carens vomere.

3 b. Tu flos caste candidatus,
Flos et fructus de te natus
Crucis rubens sanguine.

4 a. Flos spineto cruentatus,
Quando spinis coronatus
Mundum lavit crimine,

4 b. Ubi virgo virginali,

Casta casto, par aequali
Donaris custodiae.

5 a. Stabat, inquit, iuxta crucem
Mater Iesa dolens trucem
Mortem pati vitae ducem,
Stabat et discipulus.

5 b. Stabat ille, qui electus
Verae vitis palmes rectus
Quique magis est dilectus
Ac familiarius.

6 a. Mater, inquit, ecce, natus,
Natus tibi pro me datus,
Tui custos caelibatus,
Zela caelebs caelibem.

6 b. Mox ad illum: ecce, tua,
Tua mater, hanc procura,
Venerare fide pura

Servans virgo virginem.

7 a. Sancta virgo, felix mater,
Sancte fili, nobis pater,
Vestrae partem nos tutelae,
Vestrae sortem clientelae
Velitis efficere,

7 b. Vitae porta, nos conforta,
Stella maris, nos amaris
Mundi curis, heu, quam duris,
Umbra mortis, novae sortis
Virgo clemens, exime.

8 a. Nemo frustra te precatur,
Qui pro suis anxiatur
Meritis, Maria.

8 b. Tu peccato clausus hortus,
Sed peccanti patens portus,
Lapsis dux et via.

9 a. Virgo mater, nati nata,
Nobis assis exorata,
Ut, qui per nos nil habemus,
Unde iuste postulemus
Sempiterna gaudia,

9 b. Licet valde peccatores,
Tui tamen laudatores
Liberati cruciatu
Per te simus de reatu
Saltem digni venia.

10 a. Non nobis, domina,

non nobis, sed nomini tuo

da gloriam,

ut in nobis tua dona

munerentur,

tuque de nobis, qui Sanir

et Hermon, coroneris.

10 b. Electa ut sol,

sole clarior et unice

dilecta,

da nobis scire te, scire

nos, dilectum

ex dilecto amborumque

sanctam dilectionem.

11. Nos et nostra pia
defende maris stella.