43. De sancto Spiritu.

1. Assit nobis divinitus
Gratia sancti spiritus
Nostris inspirans sensibus,
Quod bonum sit volentibus
Fervere suis laudibus.

2 a. Tu vinclum insolubile
Trinitatis essentiae,

2 b. Tu amor deitatis,
Tu calor caritatis.

3 a. Tu fons indeficiens
Omnis sanctitatis,

3 b. Tu mons supereminens
Altae bonitatis.

4 a. Columba tu mitissima,
Tu lingua facundissima
Et magistra vitae,

4 b. Ignis es tu illuminans,
Debilia corroborans
Et accendens mite.

5 a. Tu sordida purificas,
Dissoluta consolidas
Et aspera tu mitigas
Mira suavitate.

5 b. Sanas corda languentia
Ac sublevas iacentia
In imis desperantia
Ingenti puritate.

6 a. Dura tu mollificas,
Mortua vivificas

Ad aeternam vitam:

6 b. Arida rorificas,
Tibi tu pacificas
Animam contritam.

7 a. Tristes tu laetificas
Pavidos et animas
Viriliter resistendum

7 b. Cunctis Christi aemulis,
Ingratos et instruis
Fideles ad imbuendum.

8 a. Ergo, tu altitonans,
Fac, ut tibi consonans
Nostra fiat vita,

8 b. Corda nostra arida
Tuo rore rorida
Solida, ut ita

9. Sint digna habitacula
In saeculorum saecula,
Ad te nos invita.