SERMO LIV.

IN EODEM FESTO

DEDICATIONIS.

Egressus Jacob de Bersabee, pergebat Haran. Viditque in somnis scalam stantem super terram, et cacumen illius tangens coelum: Angelos quoque Dei ascendentes et descendentes per eam, et Dominum innixum scalas dicentem sibi : Ego sum Dominus Deus Abraham Patris tui, et Deus Isaac. Gen. xxviii, 10,12 et 13.

Quatuor occurrunt hic notanda :

I. Quis sit Jacob a quo scala videtur ?II. Quae sit scala quam vidit ?

III. Quare Angeli per ipsam ascendere et descendere videantur ? IV. Cur etiam Dominus scalae innixus videatur ? I.

De primo nota: Per Jacob quilibet fi- delis qui salvari desiderat, cum ipso intelligitur. Jacob enim supplantator interpretatur, ut scilicet supplantet illum colubrum tortuosum, qui navigantes in hoc magno mari, id est, in hoc mundo, nititur degluttire, et qui eum supplantabit : necesse est ut egrediatur Bersabee,

et pergat Haran. Bersabee interpretatur puteus satians, sicut dicitur hoc saeculum mundus, quasi minime mundus. Hic est puteus, de quo Psalmista in Psal. lxviii, 16, deplorat liberari dicens : Non me demergat tempestas aquse,nec absorbeat me profundum: neque urgeat super me puteus os suum. Aqua hujus putei non satiat : quia qui bibit ex hac aqua, sitiet iterum. Haran interpretatur mons vel sublimitas, et exprimit nobis patriam aeternae lucis, quae est in monte omnium montium constituta.

De Bersabee igitur pergit Haran, qui gaudium mundi perniciose satians contemnit, et haereditatem patrias coelestis desiderat adipisci : sed talibus necesse est, ut ad montem illum per scalam ascendant.

II.

De secundo nota : Scala ista per quam ascendendum est, sunt decem precepta Moysi data : latera sunt dilectio Dei et proximi. Primum mandatum est : Ego sum Dominus Deus tuus, qui eduxi te de terra aegypti, de domo servitutis. Non habebis Deos alienos coram me corde, neque adorabis eos ore, neque coles eos opere. Ego sum Dominus Deus tuus, fortis, zelotes, visitans iniquitatem patrum in filios, usque in tertiam et quartam generationem eorum qui oderunt me: Et faciens misericordiam in millia his qui diligunt me, et custodiunt praecepta mea. Secundum est: Non assumes nomen Dei tui in vanum : nec enim habebit insontem Dominus eum qui assumpserit nomen Dei frustra. Tertium est : Memento ut diem sabbati sanctifices. Sexdiebus operaberis, et facies omnia opera tua. Septimo autem die sabbatum Domini Dei tui est : non facies omne opus in eo, tu, et filius tuus et filia tua, servus tuus et ancilla tua, Jumentum tuum, et advena qui est intra portas tuas. Quartum est: Honora patrem tuum et matrem tuam, ut sis longaevus super terram quam Dominus Deus tuus dabit tibi. Quintum est: Non occides manu, vel dente, vel consensu. Sextum est : Non moechaberis, id est, non commiscearis alicui, excepto matrimonio. Septimum est : Non furtum facies, nec rapies. Octavum est : Non loqueris contra proximum tuum falsum testimonium, vel omne mendacium. Nonum est : Non concupisces domum proximi tui. Secundum Augustinum, " hic " prohibet concupiscentiam rei alienae " immobilis. " Decimum est : Non desiderabis uxorem ejus, non servum, non ancillam, non bovem, non asinum, nec omnia quae illius sunt.

III.

De tertio nota : Per hanc scalam videntur Angeli descendere, homines in ipsam elevando : ascendere etiam dicuntur homines per ipsam opportunius devehendo. Angeli enim hominem ad bonum excitant et elevant, et in bono elevatum de virtute in virtutem deducunt spiritus. Unde Propheta in Psalm. CXLII, 10 et 11 : Spiritus tuus bonus deducet me in terram rectam : Propter nomen tuum Domine vivificabis me, in aequitate tua.

IV.

De quarto nota, quod Dominus scalae stat innixus, ut ascendentes per virtutes tamquam pius pater hilariter recipiat, et receptos pro mercede laboris gloriosissime coronet corona asternae glorias. Quod, etc.