Acta Francisci Pp. 437

II

MONGOMENSIS

In Guinea Aequinoctialis, dismembrato territorio dioecesis Ebebiyinensis, dioecesis Mongomensis conditur.

FRANCISCUS EPISCOPUS

ServuS Servorum Dei

aD perpetuam rei memoriam

Onerosa pastoralis cura caritati Nostrae commissa exigit, ut in omnibus

his, per quae christifidelium bono et Ecclesiarum felici regimini consulitur,

apostolicae Nostrae auctoritatis partes interponamus eaque studiose fovea-

mus, quae ad animi perfectionem homines perducant et ad christianae redemp-

tionis fructus ceteris impertiendos et quoquoversus propagandos conferre

valeant. His perpensis, mentem Nostram convertimus ad dilectos christifideles

in Guinea Aequinoctiali, pro augmento religionis et animarum utilitate pos-

tulationem novae dioecesis ibi constituendae attente considerantes.

Favorabili igitur habito voto Venerabilis Fratris Petri Pioppo, Archiepis-

copi titularis Torcellani et Apostolici in Guinea Aequinoctiali Nuntii, de

consilio Congregationis pro Gentium Evangelizatione preces ad Nos admo-

tas animarum saluti valde profuturas censuimus libentesque excipiendas

decrevimus.

Proinde, Apostolicae Nostrae potestatis plenitudine, a dioecesi Ebebiyi-

nensi omne territorium districtus civilis finibus in praesens vulgo Wele-Nzas

circumscriptum distrahi statuimus atque ex ita distracto territorio novam

dioecesim, Mongomensem nuncupandam, erigimus ac constituimus.

Huius novae dioecesis sedem in urbe vulgo Mongomo decernimus eccle-

siamque ibi exstantem, Deo in honorem Beatae Mariae Virginis ab Immacu-

lata Conceptione dicatam, ad gradum et dignitatem ecclesiae Cathedralis

evehimus, cunctis consentaneis concessis iuribus et privilegiis.

Novam insuper dioecesim Mongomensem statuimus Metropolitanae Ec-

clesiae Malaboënsis suffraganeam atque iurisdictioni Congregationis pro

Gentium Evangelizatione obnoxiam. Cetera vero secundum leges canonicas

temperentur.