Congregatio pro Doctrina Fidei 489

ACTA CONGREGATIONUM

CONGREGATIO PRO DOCTRINA FIDEI

NOTA DOCTRINALIS DE QUIBUSDAM RATIONIBUS EVANGELIZATIONIS.

I. Introductio

1. Missus a Patre ad Evangelium nuntiandum, Dominus Iesus Christus

omnes homines ad conversionem et ad fidem invitare non desinit (cfr Mc 1,

14-15), cum Apostolis mandaverit, post resurrectionem suam, officium pro-

sequendi missionem suam evangelizationis (cfr Mt 28, 19-20; Mc 16, 15; Lc 24,

4-7; Act 1, 3), dicens: « sicut misit me Pater et ego mitto vos » (Io 20, 21; cf. 17,

18). Etenim, per Ecclesiam, Ipse vult adesse cunctis historiae aetatibus,

cunctis terrarum orbis regionibus cunctisque civium consortionis provinciis,

scilicet pervenire vult ad cor hominis cuiusque, ut omnes fiant unus grex et

unus pastor (cfr Io 10, 16): « Euntes, inquit, in mundum universum, praedi-

cate Evangelium omni creaturae. Qui crediderit et baptizatus fuerit, salvus

erit; qui vero non crediderit, condemnabitur » (Mc 16, 15-16).

Apostoli dein « a Spiritu Sancto permoti cunctos hortabantur ut vitae

viam mutarent seque converterent et baptismum reciperent »,1 quia Ecclesia

peregrinans necessaria est ad salutem.2 Et ipse Dominus Iesus Christus, qui

Ecclesiae suae semper adest, evangelizantium opus praecedit, comitatur et

sequitur, fructus afferens eorum laboribus, ut quod in primordiis evenerit,

numquam desistat per historiae decursum.

1 Ioannes Paulus II, Litterae encyclicae Redemptoris missio, 7 Decembris 1990, n. 47: AAS

83 (1991), 293. 2 Cfr Concilium Oecumenicum Vaticanum II, Constitutio dogmatica de Ecclesia, Lumen

gentium, n. 14; cfr Decretum de activitate missionali Ecclesiae Ad gentes, n. 7; Decretum de

oecumenismo Unitatis redintegratio, n. 3. Quae sententia minime contraponitur universali salvi-

ficae Dei voluntati, « qui omnes homines vult salvos fieri et ad agnitionem veritatis venire »

(1 Tim 2, 4); igitur «Necesse est duae hae veritates coniunctae teneantur, videlicet vera possi-

bilitas salutis in Christo pro omnibus hominibus et Ecclesiae necessitas ad hanc salutem » (Ioan-

nes Paulus II, Litterae encyclicae Redemptoris missio, 7 Decembris 1990, n. 9: AAS 83 [1991],

258).