350. De uno Confessore.

la. Laetabundo cordis ore
Psallat chorus in honore
Regis regum incliti,

1b. Sanctus hic cuius amore
Fastum mundi suo flore
Flocci pendit sterili.

2 a. Mente pura, voce, voto
Conversando, corde toto
Semper in caelestibus;

2 b. Verbo, vita collaudando
Deum seque conformando
Summis caeli civibus.

3 a. Martyr corpus castigando,
Carnem suam macerando
Hostem stravit pedibus.

3 b. Vita vivens Iesu Christi
Hunc secutus, quare sisti
Caeli debet sedibus.

4 a. Hic talentum sibi datum
Reportavit duplicatum,
Non celans sudario.

4 b. Audit "Euge, serve bone",
Data plena ratione
Caeli thesaurario.

5 a. Hic fidelis, prudens verna
Aula gaudet in superna
Pro mensura tritici ;

5 b. Inter coetus prophetarum
Melos audit is chordarum
Organi Davidici.

6 a. Ergo, pater et patrone,
Sis defensor in agone
Tuo consolamine,

6 b. Fac, ut data ratione
Fiat praemium coronae
Mortis in examine.