154. De sancta Agatha.

1 a. Christo laudes concinamus
Nos, qui sanctae celebramus
Agathae sollemnia.

1b. Virgo clara stirpe nata,
Mundo placens, Deo grata
Per morum insignia.

2 a. Florens hortus honestate
Et sermonis venustate
Placuit hominibus ;

2b. Sed plus Christo complacere
Atque bonis praepollere
Studuit operibus.

3 a. Huius fama redolebat
Et in cunctis recurrebat
Saeculorum finibus.

3 b. Quintianus, servus pecuniae,
Totus studens idololatriae,
Suis tribunalibus

4 a. Illam iubet praesentari,
Ut diversis consummari
Possit cruciatibus.

4 b. Hanc conatur inflectere,
Tentat quoque seducere
Mentem malis artibus.

5 a. Illam ergo deludendam
Et a vero dimovendam
Tradit Aphrodisiae;

5 b. Christianam abnegare
Nec consentit violare
Iura pudicitiae.

6 a. Eius quippe mens fundata
Et in Christo solidata
Verbis nescit cedere.

6 b. Tunc immitis Quintianus,
Velut fera inhumanus
Educit e carcere.

7 a. In catasta sublevatur,
Et mamilla cruciatur
Amputanda penitus.

7 b. Sed perstat immobilis
Puella praenobilis,
Roborata caelitus.

8 a. Testas atque prunas dari
Iubet statim, volutari
Super istas, hinc cremari
Nuda carne virginem.

8 b. O quam dire cruciatur,
Dum hinc testis laniatur,
Inde flammis ustulatnr
Pium spargens sanguinem.

9 a. Gratulantes tuae laudi,
Virgo sancta, nos exaudi
Et in malis constitutos
Huius vitae redde tutos
Per tua suffragia.

9 b. Tu, quae flammas cxurantes
Aetnae montis et crepantes
Globos ignis repressisti,
Fac nos coram Deo sisti
Post mundi naufragia.