302. De sancto Olavo.

1. Lux illuxit laetabunda,
Lux illustris, lux iucunda,

Lux digna praeconio.
In solenne gaudium
Prorumpat fidelium
Sincera devotio.

2 a. Gloriosus hodie

Christi martyr, gloriae
Sublimatus solio,

2 b. Pro aeternis brevia
Commutavit gaudia
Felici commercio.

3 a. Insignis martyris

insignis gloria,

Dulcis est gaudii

dulcis materia.

3 b. Insiste canticis,
mater ecclesia,
Caelesti iubilo
tange caelestia.

4a. Inter curas absolutus
Rex Olavus, constitutus
In regni fastigio,

4 b. Suspirabat in aeterna,
Praevolabat in superna
Mentis desiderio.

5 a. Christi tractus in odore,
Christi languens in amore,
Vires sumens ex languore,
Corde, votis, factis, ore,
Quem amabat, coluit.

5 b. Hic nec minis nec terrore
Mortis fractus nec labore
Idolorum ab errore
Multo quidem cum sudore
Gentem suam eruit.

6 a. Tulit ab impia

Gente ludibria,

Minas et odia,

Poenas, exsilia,

Sed mente stabili ;

6 b. Mira constantia
Devicit omnia,
Felix felicia
Migrans ad gaudia
Cum palma nobili.

7 a. Ante diem passionis
Ad instantis vim agonis
Animatus visionis
Divinae solacio,

7 b. Quod amabat, praegustavit,
Praegustatum plus optavit,
Plus optatum vendicavit
Illustri martyrio.

8 a. Rex et martyr triumphalis,
Tutor noster specialis,
Tua proles spiritalis
Sit ab huius mundi malis
Te tuente libera.

8 b. Quos infestat vis carnalis,
Corruptela generalis,
Testis potens et letalis,
Nos sub tuis tutos alis
Tua salvet dextera.