Dicit igitur :

" Et egrediebantur, "

Ex propriis actibus, et rebus, et negotiis. Actus pertinent ad peccata, et peccatorum circumstantias et occasiones : res autem pertinent ad infirmitatis solatia : et negotium ad curas. Nihil enim habet homo proprium nisi peccatum : omnia alia accepit a Deo. I ad Corinth.IV, 7 : Quid habes quod non accepisti ? De hoc egressu, Genes. xii, 1, dicitur : Egredere de terra tua, et de cognatione tua. Numer.XVI, 26 : Recedite a tabernaculis hominum impiorum.

" Ad. eum. "

Non enim sufficit egredi, nisi perveniatur usque ad illum per doctrinae imbuitionem, et exempli informationem. Aliter enim dicetur nobis illud Job, VI,

21 : Nunc venistis, et modo videntes plagam meam timetis. Denter,XXXIII , 3 : Qui appropinquant pedibus ejus, accipient de doctrina illius.

" Omnis regio Judaeae. "

In quibus notantur subditi. Praelati enim sacerdotum et regum erant Ierosolymitae : et liberi erant respectu aliorum. Job, iii, 19 : Parvus et magnus ibi sunt, et servus liber a domino suo. Psal. xlviii, 3 : Quique terrigenae, et filii hominum, simul in unum dives et pauper. Admiratio enim tantae sanctitatis attraxit omnes.

" Et Jerosolymitae universi "

In quibus notantur Praelati.

" Et baptizabantur ab illo. "

Ecce obedientia : quia hoc suadebat Joannes. Egredi tantum ad Prophetam parvum est, nisi obediatur Prophetae. Isa. I, 16 : Lavamini, mundi estote, auferte malum cogitationum vestrarum ab oculis meis. Zachar. xiii, 1 : Erit fons patens domui David, et habitantibus Jerusalem in ablutionem peccatoris, et menstruatae.

" In Jordanis flumine. "

Sicut per baptizationem tangit sacramenti modum, ita per Jordanem tangit figuratam praeparationem ad baptismum. Jordanis enim interpretatur aliena descensio, sive humilis descensus. Et attende quod secundum Hieronymum, aquae superiores affluunt super intrantem in Jordanem : aquae autem inferiores separantur, et non attingunt intrantem. Unde, Josue, iii, 16, cum intravit arca in Jordanem, superiores affluentes ad ar- cam, stabilitatem et altitudinem acceperunt : inferiores autem in deterius mutatae sunt, quia defluxerunt in salsedinem maris. Sic Christo (arca deitatis) intrante in baptizatum , aquas per vias rationis humanae quae fluunt ad ipsum stabilit per mentis continentiam, et exaltat per justitiam. Quae autem fluunt ab ipso inferiores sunt, quae pertinent ad carnis concupiscentiam : et has in deterius mutat amaritudinis aeternae. Et sic corpus Christi talibus non proficit, sed in deterius mutat. I ad Corinth. XI, 29 : Qui manducat et bibit indigne, judicium sibi manducat, et bibit : non dijudicans corpus Domini. Vel, oportet aliena quae non sunt secundum naturam, humiliter abluere, sicut in figura docet Joannes : et in justitia exaltari, et inferioribus fluxibilibus in amaritudinem poenitentiae converti. Psal. cxiii, 3 : Jordanis conversus est retrorsum. Genes. VII, 17 : Multiplicatae sunt aquae, ei elevaverunt arcam in sublime. Aquae enim per naturam pervietatis, etfaecunditatis, et ablutivae virtutis in bona sumuntur significatione : quae confluentes exaltant hominem ad coelestia. Per naturam autem fluxibilitatis, et frigiditatis, et instabilitatis, significant concupiscentiam : et hae debent defluere (alias, mutari) in mare. Genes.I, 7 : Deus divisit aquas quae erant sub firmamento, ab his quae erant super firmamentum. Daniel. iii, 60 : Benedicite, aquae omnes quae super coelos sunt, Domino.

" Flumine, "

Hoc est, affluentia donorum quae praefigurantur in Christi baptismate futuro.. Psal. xlv, 5 : Fluminis impetus laetificat civitatem Dei, Ezechiel. XXXVI, 25 : Effundam super vos aquam mundam, et mundabimini ab omnibus inquinamentis vestris.

" Confitentes peccata sua. "

Praeparando se ad baptisma. Praedicabat enim Joannes, Luc. iii, 8 : Facite fructus dignos poenitentiae. In poenitentia autem praecedit compunctio, sequitur confessio, et perfectionem inducit satisfactio : et fructus hujus est plena peccati remissio. Jacob. v, 16 : Confitemini alterutrum peccata vestra, et orate pro invicem ut salvemini. Josue, vii, 19 : Fili mi, da gloriam Domino Deo Israel, et confitere, atque indica mihi quid feceris, ne abscondas. Dicit autem, " peccata, " contra eos qui in confessione narrant non peccata, sed maculant confessionem, aliorum actuum narratione interposita. Contra quod dicitur, Isa. xliii, 25 : Dic tu iniquitates tuas : quasi dicat, alia non dicas : cum detestatione enim eorum quae narrantur fit confessio. Quae autem non sunt peccata, non sunt detestanda. Psal. XXI, 5 : Dixi : Confitebor adversum me injustitiam meam Domino, hoc est, iniquitatem narrans, quae sola est adversum me.

Sequitur. " Sua, " non aliena. Et hoc est contra eos qui in confessione produnt alios plus quam seipsos : quod non est faciendum.. Ad Roman. XIV, 12 : Unusquisque nostrum pro se rationem reddet Deo, non pro alio. Jerem. iii, 2 : Leva oculos tuos in directum, et vide ubi non prostrata sis. De ista confessione dicitur, Eccli. XVII, 26 et 27 : Ante mortem confitere : a mortuo, quasi nihil, perit confessio. Confiteberis vivens, vivus et sanus confiteberis : et laudabis Deum, etc. Isa. xxxviii, 19 : Vivens, vivens ipse confitebitur tibi, sicut et ego hodie.

" Et erat Joannes vestitus pilis cameli, et zona pellicea circa lumbos ejus, et locustas et mel silvestre edebat. "

Dicit hic qualitatem vitae, quae potius est in miraculum quam quod aliquis imitari possit. Et hoc etiam omnes trahebat ad auditionem (alias, audiendum), et vincebat ad credendum. Tangit autem qualis fuit in vestitu, et qualis in victu. De domo enim et familia nulla erat quaestio in eo qui eremi erat incola.

De vestitu notantur quatuor : asperitas, humilitas, paupertas, et hoc in vestimento protegente, et quarta notatur continentia in veste non protegente. Per pilos enim notatur asperitas : per camelorum pilos humilitas : per vestitum talem, in quo sola est verecundiae protectio, notatur paupertas. De asperitate, Matth. XI, 8 : Quid existis in desertum videre ? hominem mollibus vestitum ? Ecce qui mollibus vestiuntur in domibus regum sunt. De humilitate, Eccli. XI, 4 : In vestitu ne glorieris umquam. De utroque horum dicitur, Job, XVI, 16 : Saccum consui super cutem meam. Ad Hebr. XI, 37: Circuierunt in melotis, in pellibus caprinis egentes, angustiati, afflicti : quibus dignus non erat mundus. De paupertate dicitur, Tob. IV, 23 : Pauperem vitam gerimus, sed multa bona habebimus, Psal. XXIX, 12 : Conscidisti saccum meum, et circumdedisti me laetitia. De quarto vestimento dicitur :

" Zona pellicea, "

In .qua notatur cingulum continentiae et castitatis, et memoria mortis, et castigatio concupiscentiae carnalis. Zona enim continet et constringit : pellicea, memoriam mortis Inducit : et circa lumbos, locus est concupiscentiae carnalis, mortificationem significans. Isa. XI, 5 : Erit justitia cingulum lumborum ejus, etfides cinctorium renum ejus. Haec est enim justitia quae debetur carni : et fides quae debetur vero animae viro, ne suscipiatur adulter. Luc. XII, 35 : Sint lumbi vestri praecincti. IV Reg. I, 8 : Vir pilosus, et zona pellicea accinctus renibus. In lumbis enim vigor concupiscentiae est: ideo de diabolo dicit Deus, Job, xl, 11 : Fortitudo ejus in lumbis ejus, et virtus illius in umbilico ventris ejus.

Ecce qualis fuerit in vestitu.