Quinquagena II.

51. Ave, fons laetitiae

Omnisque dulcoris,
Stillas fundens gratiae

In cor peccatoris,
Abigas malitiae

Causas et erroris,
Quis premor cotidie

Intus atque foris.
52. Ave, sidus nobile,

Tuum per fulgorem
Omne fugans flebile

Hostisque horrorem
Cor abominabile

Meum ob foetorem
Scelerum fac habile

Ad Dei amorem.
53. Ave, Christi Domini

Mater atque nutrix
Cunctisque discrimini

Datis pia tutrix,
Digne nostro crimini

Poenae sis solutrix
Dicens: Consolamini,

Vestra sum adiutrix.
54. Ave, campi lilium,

Flos virginitatis,
Satus per consilium

Sanctae trinitatis,
Placa tuum filium

Offensum pecccatis
Et praesta auxilium

Animo turbatis.

55. Ave, mater nesciens

Virum in conceptu
Gaudioque pariens

Christum, non cum fletu,
Esto nos eripiens

A malorum coetu
Et in fine redimens

A gehennae metu.
56. Ave, fontis gratiae

Rivus salutaris,
Quae misericordiae

Mater praedicaris,
Unde ab ecclesiae

Filiis laudaris,
Pro quibus et gloriae

Regem deprecaris.

57. Ave, caeli lilium,

Laudes pango cui,
Benedictum filium,

Fructum ventris tui,
Monstra nobis praemium,

Quo possimus frui
Contemplando gaudium

Semper vultus sui.

58. Ave, Deum pariens

Felix creatura,
Sed pudorem retinens

Virgo manens pura,
A me sis abiciens

Cuncta nocitura
Uti tibi serviens

Mente sim secura.

59. Ave, invincibilis

Turris quae firmata
Divis propugnaculis

Es et decorata,
Nulla clavi masculis

Unquam reserata,
Sed Dei signaculis

Semper sigillata.

60. Ave, stella, puritas

Cuius illustravit
Mundum, qui per tenebras

Scelerum erravit,
Sed tunc eius caecitas

Plurimum cessavit,
Cum se verbi deitas

Carne calceavit.

61. Ave, sapientiae

Mater illibata,
Regina clementiae

Merito vocata,
Exora iustitiae

Regem, o beata,
Ut nostrae nequitiae

Diluat errata.

62. Ave, stirps, qua floruit

Nux amygdalina,
Per quam cunctis patuit

Olim fraus vulpina,
Ecce, nyx occubuit,

Nobis matutina
Sed per te resplenduit,

O stella marina.

63. Ave, virgo mystico

Stans ornata flore,
Irrigata caelico

Divinoque rore,
Me fantem poetico

Laudes tuas more
Praeserves ab hostico

Undique timore.

64. Ave, splendorifera

Stella sedans fluctum
Maris et ad aethera
Iustis dans conductum,

Ortum propter scelera
Nostrum pelle luctum,

Donans pacis foedera
Et amoris fructum.

65. Ave, rosa recreans

Virtutum odore,
Cuius cano iubilans

Laudem hoc tenore,
Cor meum sis relevans

Ab omni languore
Hostis infert minitans

Quem suo horrore.

66. Ave, nobilissimum

Templum trinitatis,
Fidei signaculum,

Lumen veritatis,
Spei retinaculum,

Splendor claritatis,
Amoris vehiculum

Lima pravitatis.

67. Ave, cuius dignitas

Cunctis est laudanda,
Maxime fecunditas

Nobis amplexanda,
Qua verbi divinitas

Fuit incarnanda
Et vetus captivitas

Adae reparanda.

68. Ave, prudens hospita

Christi exsulautis,
Ad caelos deperdita

Umero portantis,
Fomitem debilita

Modo te laudantis,
Ne curram per abdita

Carnis petulantis.

69. Ave, caeli ianua,

Quam hac cautione
Laudo mentis cernua

Supplicatione,
Sis mihi contigua

Cum defensione,
Ne supplanter nocua

Hostis suasione.

70. Ave, mater inclita,

Cuius ab amorem
Concino poemata

Laudis per tenorem,
Me per tua merita

Piumque favorem
Amplius habilita

Tuum ad honorem.

71. Ave, vellus gratia

Caelica complutum,
Confortans constantia

Vatem destitutum,
Omni me iustitia

Facito imbutum
Replens abundantia

Pacis et virtutum.

72. Ave, spes humilium,
Pausa fatigati,
Solamen fragilium,
Sinus tribulati,
Adhibe remedium
Meae pravitati,
Pellens gelicidium
Cordis obdurati.

73. Ave, sanctuarium

Christi singulare,
Quo ter trium mensium

Tempore pausare
Voluit, subsidium

Digneris praestare
Conanti praeconium

Tuum decantare.

74. Ave. virgo humilis

Christique alumna,
Mons amoris, stabilis

Fidei columna,
Hostem tuis famulis

Infestum expugna,
Per quem indicibilis

Minatur aerumna.

75. Ave, venerabilis

Mater et ancilla
Christi, quam spectabilis
Meminit Sibylla,

Fidei sit stabilis

Domus et tranquilla,

Sit imperturbabilis
Semper pax in illa.

76. Ave, quae deliciis

Paceque interna
Frueris et gaudiis

In Sion superna,
Absolvas a vitiis

Me prece materna,
Ne tradar suppliciis

Saecla per aeterna.

77. Ave, sidus gratiae,

Decus firmamenti,
Per rorem clementiae

Fruges dans egenti,
Fructum paenitentiae

Da mihi petenti,
Tandem eucharistiae

Panem sacramenti.

78. Ave, mundi domina,

Cuius ob honorem
Ista cano carmina

Dulcem per tenorem,
Meorum extermina

Criminum putorem
Deoque conglutina

Verum per amorem.

79. Ave, o frugifera

Vinea dans fructum
Sanantem per scelera

Hominem destructum,
Clementer me repara

Ab hoste seductum,
Tribuens ad aethera

Liberum conductum.

80. Ave, nubes lucida,

Ferens in Aegyptum
Velut mater provida

Fructum benedictum,
Prece tua valida

Redde me invictum,
Ut vincam intrepida

Mente maledictum.

81. Ave, mundi inclita

Potensque Augusta,
Olim stirpe genita

Adae de vetusta,
Sed nunquam per debita

Scelerum onusta,
Sed multa per merita

Gratiae venusta.

82. Ave, admirabilis

Virgo sed fecunda,
Cui in cunctis saeculis

Nulla est secunda,
Cor meum a maculis

Criminum emunda
Omniumque titulis

Virtutum fecunda.

83. Ave, tabernaculum

Factum deitatis,
In quo solvit saeculum

Christus a peccatis,
Solve, precor, vinculum

Meae pravitatis,
Mihi habitaculum

Dans aeternitatis.

84. Ave, ager caelicae

Benedictionis,
Florens vi deificae

Miserationis,
Per fructum dominicae

Incarnationis
Evae poenam abice

Maledictionis.

85. Ave, fax illuminans

Corda tenebrosa,
Ab illis eliminans

Cuncta vitiosa,
Meum sis laetificans,

Mater gratiosa,
Ut semper magnificans

Sit te gloriosa.

86. Ave, domus aurea
Civitas murata,
Tu fenestra vitrea
Sole radiata,

Mea, fac, sint carnea

Vitia sublata,
Ut mens ad aetherea

Semper sit levata.

87. Ave, quae regalibus

Orta parentelis,
Salutata vocibus

Sancti Gabrielis,
Meis aurem precibus

Inclinare velis,
Fodior qui iugibus

Inimici telis.

88. Ave, fecundissima

Mater Deum gignens,
Corpore et anima

Virgo semper manens,
Meae mentis intima

Ita sis disponens,
Ut sit iucundissima

Legi dei parens.

89. Ave, splendor mentium

Et illuminatrix
Atque innocentium

Omnium amatrix,
Carne decedentium

Illuc sis delatrix,
Ubi in perpetuum

Regnas imperatrix.

90. Ave, praeamabilis

Mundiali gyro,
Virgo venerabilis,

Mater sine viro,
Cum sub culpae vinculis

Graviter suspiro,
Tunc sub tuis scapulis

Dulciter respiro.

91. Ave, vas clementiae

Vasque pietatis,
Cedrus pudicitiae,

Myrtus lenitatis,
Cupressus fraglantiae,

Nardus caritatis,
Palma patientiae,

Limes aequitatis.

92. Ave, vellus madidum

De caelesti rore,
Concepisti filium

Cum salvo pudore,
Indue me miserum

Virtutum decore,
Multorum qui scelerum

Cario putore.

93. Ave, thronus iudicis

Statim adfuturi,
Cum choris angelicis

Cuncta discussuri,
Fac, in conscientiis

Semper simus puri,
Ne fleamus vindicis

Poenas luituri.
94. Ave, caeli domina

Vitaeque dulcedo,
Qua fugantur crimina

Mentisque torpedo.
Mundo consolamina

Per te data credo,
Unde iubilamina

Ista tibi edo.
95. Ave, cuius gratia

Cano reverenter,
Haec Dei clementia

Scripta luculenter,
Meis da suffragia

Mortuis clementer,
Ad te per suspiria

Qui clamant dolenter.

96. Ave, quam attentius
Caeli monarchia
Veneratur laudibus
Iugi symphonia,

Et nunc in ductilibus

Tubis tibi, pia,
Meus psallit spiritus

Hac in hymnodia.

97. Ave, proles regia,

Quam praecinuerunt
Antiqua praesagia

Vatum, qui scripserunt
Tua privilegia,

Quae coronaverunt
Te et ad collegia

Caeli invexerunt.

98. Ave, tabernaculum

Summi Salomonis,
Moysi spectaculum

Rubo visionis,
Vellus nobilissimum

Vatis Gedeonis,
Recompensa iubilum

Hunc in caeli thronis.
99. Ave, cuius laudibus

Astra, solum, mare
Semper diligentius

Gliscunt insudare,
Meque fac devotius

Tibi iubilare,
Tandem in caelestibus

Tecum exultare.
100. Ave, praeclarissimum

Domini conclave,
Semper stans mundissimam

Peccatorum a vae,
Audi nobilissimum

Melos et suave,
Quod tibi centesimum

Plaudens dico, Ave.