Quinquagena II.

51. Ave, cuius gloria

Laude et honore
Pango laudatoria

Poetarum more,
Mea in memoria

Esto cura dulcore
Pellens decoloria

Mali cum auctore.
52. Ave, princeps retinens

Ius imperiale
Mundi ac diripiens

Iugum infernale.
Cor meum desipiens

Tibi penetrale
Fac, inde abiciens

Pondus criminale.

53. Ave, cuius nomine
Iuste gloriamur
Quemque laudum carmine
Digne veneramur,

Tuo sub umbramine,
Iesu, protegamur,

Hostium a turbine
Quia tribulamur.

54. Ave infinities,

Iesu, lux divina,
Lustrans ut meridies

Corda columbina,
Per te saeva rabies

Cesset leonina
Eiusque satellites,

Fraus quoque vulpina.

55. Ave, Iesu, gaudium

Meum singulare,
Quem per hoc psalterium

Conor collaudare,
Praesta per suffragium

Matris tuae carae,
Fortiter me hostium

Ausum debellare.

56. Ave, panis caelice,

Qui esuriei
Succurris mirifice

Famulorum Dei,
Peto, rex magnifice,

Miserere mei
Auferendo hosticae

Fraudes rabiei,

57. Ave, flos praelucide

Amoris divini,
Rore pellens valide

Morsus serpentini
Virus, audi placide

Melos vespertini
Cantici, quod fervide

Canunt inquilini.

58. Ave, qui nos gratia

Tuae pietatis
Elimas a scoria

Nostrae pravitatis,
Contere potentia

Tuae maiestatis
Hostem cum versutia

Suae falsitatis.

59. Ave, vera claritas,

Quae pallorem nescis,
Qua fugatur falsitas

Mentium que pestis,
Tua praestet pietas

Consolamen maestis,
Quos gravat adversitas

Motibus molestis.

60. Ave, quem a saeculo

Mundo prophetatum
Credimus, ab angelo

Matri nuntiatum,
Da credenti populo

Tuum famulatum
Sequi corde sedulo,

Servare mandatum.

61. Ave, cui sinceriter
Glisco deservire.
Et amplexus dulciter
Tuos introire,

Digneris velociter

Mihi subvenire,
Ne me culpae turpiter

Possint impedire.

62. Ave, sidus fulgidum,

Stella matutina,
Pectus purgans sordidum

A culpae sentina,
Fastum mentis turgidum,

Tuae disciplina
Legis fac me subditum

Tibique combina.

63. Ave, qui es specie

Mire decoratus
Atque donis gratiae,

Placidus et gratus,
Maerores ecclesiae

Cerne miseratus,
Auctoris nequitiae

Quam turbant conatus.

64. Ave, cui concinimus

Hymnum in praesenti,
Terram cum caelestibus

Provide regenti,
A lupis rapacibus

Manu nos potenti
Serva et a facibus

Aeterni tormenti.

65. Ave, praeclarissimum

Animae monile,
Gratia cor stolidam

Faciens civile,
Concinentem famulum

Opus hoc servile
Introire caelicum

Facito cubile.

66. Ave, quem glorifico

Hanc per hymnodiam,
Quam per sacram colligo

Hagiograpbiam,
Tibi, Christe, supplico

Matrem per Mariam,
Mihi des erratico

Te sequi vitae viam.

67. Ave, fons, quo defluunt,

Rivi gratiarum,
Qui credentum diluunt

Maculas culparum,
Unde chori concinunt

Tympanistriarum
Laudes, quibus affluunt,

Amicitiarum.

68. Ave, fons progrediens

Davidis de domo,
Adae sordem abluens

Contractam in pomo,
Per sitim, quam moriens

Sanctae crucis ramo
Sensisti, sis protegens

Me ab hostis hamo.

69. Ave, qui principio

Cares atque fine,
Regnans in consortio

Unitatis trinae,
Tempus, quo de medio

Tollar, est affine,
Hinc clamo: precario

Subveni festine.

70. Ave, fons melliflue,

Potum dans salutis
Te tua continue

Gratia secutis,
Noxas graves dirue

Meae iuventutis
Et felicem tribue

Statum senectutis.

71. Ave, qui in nomine

Tuo confidentes
Miro facis germine

Virtutum florentes,
Hoc in tuo carmine

Te benedicentes
Sint sub pacis tegmine

Tuae quiescentes.

72. Ave, cui adhaereo

Hunc per famulatum,
Nam te summa censeo
Laude sublimatum,

Te exorans adeo
Pro me flagellatum,

Ut luto venereo
Mundes maculatum.

73. Ave, qui catholicae

Es religionis
Auctor, sed haereticae

Pulsor fictionis,
Sis ecclesiasticae

Memor nationis
Atque caput deice

Barathri draconis.

74. Ave, Iesu inclite

Rector Olymporum,
Regens tuos debite

Loris praeceptorum,
Dicens: apprehendite

Disciplinam morum,
Ne dicam " discedite"

In fine saeculorum.

75. Ave, lux deifica,

Splendens a remotis
Corda in pacifica,

Quaeso, me devotis
Tuis aequalifica

Fide tibi notis,
Sic ut spernam lubrica

Viribus ex totis.

76. Ave, sidus caelicum,

Lucem dans cursanti
Huius mundi lubricum

Culpisque erranti,
Da mihi Cherubicum

Lumen deprecanti
Et per illud canticum

Laudes tuas fanti.

77. Ave, alimonia

Populi credentis
Laudis per praeconia

Te benedicentis,
Refice inania

Meae, quaeso, mentis,
Hostium immania

Bella patientis.

78. Ave, lumen caelicum,

Auferens vaporem,
Ingerit qui pesticum

Animae languorem,
Tuum per deificum

Da mihi timorem
Declinare lubricum

Veneris ardorem.

79. Ave, rex Emmanuel

Vitaeque futurae
Dator, regem Israel

Quem dicunt scripturae,
Nuntiavit Gabriel

Virgini te purae,
Ut veniret Ismael

Ad fidem secure.

80. Ave, summa veritas,

Cunctis praecolenda,
Qua docetur falsitas

Deorum spernenda,
Tua vere deitas

Est benedicenda
Atque immortalitas

Votis appetenda.

81. Ave, princeps datice,

Princeps pietatis,
Largiens magnifice

Tuis dona gratis,
Mala cuncta abice

Nostrae pravitatis
Et consortes caelicae

Fac hereditatis.

82. Ave, o conspicue

Iesu auctor pacis,
Inimici strenue

Premens vim bellacis,
Mei saxum dirime

Cordis contumacis,
Cremer ne perpetuae

Combustura facis.

83. Ave, obumbraculum
Mentis fatigatae,
Ab hac pellens pseudolum
Cum iniquitate,

Caeli tabernaculum
Supplex precor a te,

Quo possim in saeculum
Vivere beate.

84. Ave, qui potentia

Praees universis
Concordans contraria

Motibus diversis,
Adesto cum gratia

Iam ad te conversis,
Antea per vitia

Turpiter perversis.

85. Ave, cuius laudibus

Astra matutina
Venerantes crebrius

Mente cum supina
Astant, nostris precibus

Auditum inclina,
Quos pungit validius

Peccatorum spina.

86. Ave, qui per virginem

Nasci es dignatus,
Ut salvares hominem,

Qui erat creatus
Tuam ad imaginem

Beneque ornatus,
Sed ultro per daemonem

Fuerat prostratus.

87. Ave, per quem terrea

Caelicis iunguntur,
Morte tua Stygea

Vincla dum rumpuntur,
Duc nos ad aetherea.

Iusti quo ponuntur,
Membra nostra carnea

Quando dissolvuntur.

88. Ave, principatui

Dominans superno,
Concors potentatui

Patris ab aeterno,
Tuo dominatui

Supplex me prosterno,
Medelam reatui

Ut meo des interno.

89. Ave, pulcher floscule,

Mirum odoratum
Dans ac delectabile

Reddens caeli pratum
Sit hoc acceptabile

Tibi praedicatum
Et propitiabile

Mihi decantatum.

90. Ave, vita pauperum,

Ductor ac tutela,
Hostem pellens efferum

Sua cum suadela,
En, me gravat scelerum

Turpis curruptela,
Quam tuorum munerum

Relevet medela.

91. Ave, lampas lucida,

Lumen dans serenum,
Corda mundans sordida

Per actum terrenum,
Nostrorum fac frigida

Incentiva renum
Et ad bonum solida

Per legis tuae frenum.

92. Ave, sol deifice;

Cuius claritudo
Resplendet mirifice

Mentium in sudo,
Clementer me respice,

O summa pulchritudo,
Laudi honorificae

Tuae qui insudo.

93. Ave, dans scientiam

Eruditionis,
Iustis quoque gloriam

Retributionis,
Suspende sententiam

Iustae ultionis
Largiendo gratiam

Absolutionis.

94. Ave, quem devotius

Mundum gubernantem
Credimus et colimus
In caelo regnantem,

His te in apicibus
Sedulo laudantem

Semper in caelestibus
Tibi fac astantem.

95. Ave, indicibilis

Entium pulchredo,
Cui his laudum titulis

Cantionem edo,
Laudis tuae vinculis

Me totalem dedo,
Ut me a periculis

Serves cum decedo.

96. Ave, Deus Israel,

Ave, Iesu bone,
Vocatus Emanuel

Vatis cantione,
Te recturum Israel

Iugi ditione,
Matri dixit Gabriel

In salutatione.

97. Ave, quem promiserat

Lex et prophetia,
Et carne genuerat

Beata Maria,
Cor meum desiderat

Te, dulcis Messia,
Unde tibi iubilat

Hac in hymnodia.

98. Ave, rector caelitum

Molisque terrenae,
Gratias charismatum

Menti dans serenae,
Regionis aditum

Patefac amoenae
Nobis, qua in saeculum

Te laudemus plene.

99. Ave, Iesu, ianua,

Per quam grex iustorum
Caeli scandit ardua

Donis meritorum,
Te laudantes cernua

Voce hac hymnorum
Perducas ad pascua

Praedestinatorum.

100. Ave, Iesu millies,

Ave, Iesa bone,
Salutate centies

Hac in cantione,
Me confossum septies

Scelerum mucrone
Tuae matris recrees

Deprecatione.