Distichon prooemiale.

1. Infinitae et invictae
Iesu rex potentiae,
Tu dignare mihi dare
Donum sapientiae.

2. Huc aspectum, huc affectum
Dirige propitium,
Omnis doni atque boni
A quo est initium.

3. En, propono tuo dono
Carmen tibi promere,
Ut te Iesum saepe laesum
Queam flexum reddere.

4. Sis adiutor et instructor,
Ut te possim libere
Collaudare et amare
Et sincere sapere.

5. Unguentorum me tuorum
Unge aromatibus
Et praeclaris tui paris
Cinge charismatibus.

6. Seductoris et raptoris
Animarum obrue
Cunctas fraudes, uti laudes
Tibi pangam strenue.