Quinquagena I.

1. Salve, principium

Cuncta principians,
Aeternum filium

Natura generans,
Hunc in credentium

Salutem destinans
Et hos ab hostium

Captura liberans.

2. Tua est notio

Innascibilitas
Nec non relatio,

Quae est paternitas,
Omnipotentia

Tua proprietas,
Sicut est propria

Filio veritas.

3. O sapientia

Dei mirabilis,
Mentis industria

Inperscrutabilis,
Pelle tristitiam

Servi plorabilis,
Quem gravant vitia,

Satan cum aemulis.

4. O lumen caelicum,

Descende propere,
Tuorum supplicum

Mentes invisere,
Quaeamus melicum

Ut carmen promere
Patrem et unicum,

Te quoque colere.

5. Amor suavissime,

Coniungens filium
Patri fortissime

Per tuum vinculum,
Des clementissime

Tui incendium,
Quo amem intime

Te atque proximum.

6. Pax divinissima,

Caeli cum incolis,
Gaudent qua infima

Quoque cum accolis,
Mea te anima

Ob culpam flebilis
Petit pro gratia,

Ut sit amabilis.

7. O summa trinitas

In cunctis dominans,
Omnes essentias

Perfecte ordinans,
Nostras miserias

Esto considerans
Et hostis furias

Procul exterminans.

8. Causalis omnium,

Ens o laudabile,
Linguis viventium

Inexpressibile,
Choris caelestium

Superamabile,
Menti fidelium

Sed admirabile.

9. Ens, in quo firmiter

Consistunt omnia,
Gubernas fortiter

Quae providentia,
Nos premit viliter

Hostis fallacia,
Tua celeriter

Quam pellat gratia.

10. O supersapiens

Sophia optima,
Calicis largiens

Vina dulcissima,
Repletur sitiens

Quo iusti anima,
Legem custodiens

Mente promptissima.

11. O summa sanctitas

Atque munditia,
Qua datur puritas

Nec non iustitia,
Nostras praeteritas

Culpas et vitia
Remittat bonitas

Tua et gratia.

12. O lucis claritas

Inconfuscabilis,
Cuius serenitas

Imperturbabilis,
Me gravat caecitas

Intolerabilis,
Quam tua pietas

Tollat amabilis.

13. Virtus thearcbica

Cuncta perficiens,
Ecclesiastica

Quoque instituens,
Esto phantastica

A me abiciens,
Quae vi malefica

Infert insipiens.

14. O pulchrum vividum
Et diligibile,
Per lumen splendidum
Intelligibile,

Cor meum squalidum

Et despicabile
Fac tibi splendidum

Et habitabile.

15. O lux illuminans,

Tua potentia
Cuncta vivificans

Et fovens omnia,
Sis nostra sublevans

Corda maerentia,
Caro tabificans

Quae facit saucia.

16. O substantifica

Summaque bonitas,
Cuius mirifica

Essentialitas,
Ecclesiastica

Te laudat pietas,
Modo daemonica

Quam gravat pravitas.

17. O pulchrum omnibus

Desiderabile,
Summis spiritibus

Superlaudabile,
In te credentibus

Concupiscibile,
Devotis mentibus

Semper amabile.

18. O summa deitas

Cuncta prospiciens,
Cuius est pietas

Nunquam deficiens,
Sis mentis latebras

Meae discutiens,
Ab ea morbidas

Culpas eiciens.

19. Vere homotheon

Es singulariter,
Cui Tetragrammaton

Nomen veraciter
Datur, nos de Sion

Tuta realiter,
Ne foetens Acheron

voret finaliter.

20. O sapientia

a patre prodiens,
Rationalia

in finem dirigens,
Sis me iustitia

Caecatum instruens,
Ut sim in gratia

Tua proficiens.

21. Splendor mirabilis

Paternae gloriae
Neque dissimilis

Eius potentiae,
Esto placabilis

Nostrae militiae,
Nos ligans regulis

Legis iustitiae.

22. Caro deifera

Laudanda plurimum,
Ducens ad aethera

Credentem populum
Tibi confoedera

Me tuum famulum
Et mentem repara

Per illud epulum.

23. O potentissima

Virtus, quam iugiter
Phalanx angelica

Laudat et dulciter,
Motus simplifica,

Quibus flebiliter
Curro per lubrica

mundi ac turpiter.

24. Virtus multifida

Mente cernentibus
Et fide fervida

Te metuentibus,
Expelle lurida

A nostris cordibus,
Quae facta sordida

Sunt culpae faecibus.

25. Inexhauribilis

Fons divae gratiae
Mentes a maculis
Lavans nequitiae,

Da tuis famulis
Donum scientiae,

Te laudum titulis
Ut laudent strenue.

26. O teletarchica

Illuminatio,
Fugatur hostica

Qua observatio,
Succurrat deica

Tua dignatio,
Nobis quos pestica

Vexat turbatio.

27. O ineffabile

Ens existentium,
Inattingibile

Per mentis radium,
Tui immobile

Des desiderium
Pressis per flebile

Mundi exsilium.

28. Ens personaliter

Trinum, essentia
Unum realiter

Sive substantia,
Potentialiter

Producens entia,
Gubernans dulciter

Haec providentia.

29. Summa essentia,

Incognoscibilis
Nec eloquentia

Es explicabilis,
Mentis potentia

Dupla capabilis,
Ut sapientia

Et ut amabilis.

30. O incessabile

Lucis profluvium,
Dans praeamabile

Cordi incendium,
Illustra debile

Meum ingenium,
Ut promam facile

Tuum praeconium.

31. Causa vivifica

Rerum viventium,
In mundi fabrica

Iam exsistentium,
In me mortifica

Carnis incendium,
Post mortem applica

Me gregi caelitum.

32. Vere principium

Es ineffabile,
Per omnem spiritum

Inattingibile,
Per te initium,

Ens o laudabile,
Habet proficuum

Omne creabile.

33. O summa trinitas

Carens initio
Fineque, veritas

Docet et lectio,
Tibi sit claritas

Et benedictio,
Sis nobis sanitas

Atque protectio.

34. O substantifica

Causa, principiam
In mundi fabrica

Iam existentium,
Vires mortifica

Iam persequentium
In aula caelica

Dans nobis bravium.

35. Lumen de lumine

Vere describeris,
Qui velut fulmine

Perversos conteris,
Trusos a culmine

supremi aetheris,
In iudicamine

mergendos inferis.

36. O sancte spiritus

Et fons clementiae,
Descende caelitus
Ad servos hodie,

Reple divinitas
nos donis gratiae

Tollendo penitus
causas malitiae.

37. Pacis initium

Auctorque praepotens,
Te venerandum

Corda communiens,
Sis adversantium

Molimen abigens
Amorem mutuum

Et ipsis conferens.

38. Vita mirabilis

Vivorum entium,
Ineloquibilis

Linguis mortalium,
Tamen amabilis

Menti credentium
Et appetibilis

Per desiderium.

39. O super omnia

Summaque trinitas,
Quam simplicissima

Conectit unitas,
Nobis adproxima

Per tuas gratias,
Quos premit pessima

Mundi cupiditas.

40. O filialitas

Aeterni filii,
Cui et aequalitas

Sui principii,
Absolvat pietas

Summi consilii
Ferentes animas

Ignes incendii.

41. O fons clarissime

Divinae gratiae,
Hortum uberrime

Rigans ecclesiae,
Munda citissime

Me a sorditie,
Quam causant pessime

Hostes nequitiae.

42. O summa claritas

Lucis perpetuae,
Devotas animas

Lustrans assidue,
Meas inscitias

Doctrinis imbue,
Legis per semitas

Ut vadam congrue.

43. Antiquus diceris

Et hoc per symbolum,
Eo quod concluseris

Tempus et saeculum,
Nam fluxi temporis

Eiusque circulum
Quod circum dederis,

Patet ad oculum.

44. O cor altissimi

Eructans optimum
Verbum, quod animi

Expellit vitium,
Mei pauperrimi

Animum inscium
Amoris intimi

Lustret incendium.

45. Virtus deifica

Bonorum omnium,
Quam theologica

Declarant plurimum,
Et nos sanctifica

Per sanctum spiritum
Donantem caelica

Mentisque gaudia.

46. Rex, regum domine,
Qui regis omnia
Tuo creamine
nunc existentia,

Tenta iurgamine
Mundi dominia,

Tuo spiramine
fac concordantia.

47. Summa paternitas

Patri ascribitur,
Optima veritas

Nato tribuitur,
Aeterna bonitas

Amori traditur,
Personis trinitas

Tribus includitur.

48. O lux deifica

Ignorans tenebras,
Quae visu caelica

Terramque penetras,
Emunda lubrica

Mentis et scatebras,
Quas diabolica

Insevit pravitas.
49. Ignis o caelice

Ardens suaviter,
Accendens typice,

Purgans velociter,
Me, quaeso, respice

Misericorditer,
Adversos abice,

Da bona largiter.
50. Investigabilis

Dei divinitas
Et inscrutabilis

Eiusdem trinitas
Pellat a famulis

Culpas praeteritas
Et invisibilis

Hostis versutias.