Prooemium.

1. Tibi, mater deifica,

Depromam laudum cantica
Sumpta de evangelica
Scriptura et prophetica.

2. Hinc mihi, mater gratiae,
Mater misericordiae,
Donum da sapientiae
Ac plectrum eloquentiae,

3. Evelle obstrepentia,
O virgo, mentis taedia,
Phantasmata et vitia
Omni cum iniustitia.

4. Occurre mihi obviam
Tardanti per desidiam,
Praesta mentis constantiam,
Spem, fidem atque gratiam.

5. Te iubilis et plausibus
Nec non orationibus
Aggredior attentius
Regnantem in caelestibus.

6. Orantis, mater tenera,
Affectum nunc considera,
Me filio confoedera
Per mea laeso scelera.

7. Cum tristis corde anxior,
O cunctis sanctis sanctior,
Celeriter reficior,
Cum te devote veneror.

8. Aurem praebe precatui,
Vigorem intellectui,
Candorem mentis visui
Et vim amoris mutui.