De Capitulo provinciali. Rubrica X.

Cum Regula dicat, quod " Ministri et Custodes possint in singulis Provinciis Fratres ad Capitulum convocare "; ordinamus, ut singulis annis in singulis Provinciis provinciale Capitulum celebretur, iuxta quod magis congruerit cuilibet regioni, in qua locus et dies sequentis Capituli assignetur, ita quod redeuntes de Capitulo generali proximo praecedenti valeant interesse.

Ad istud Capitulum conveniant Custodes et Fratres de Provincia, secundum quod in provinciali Capitulo fuerit ordinatum, proviso tamen, quod multitudo venientium, quo melius poterit, evitetur.

In hoc Capitulo et in aliis electionibus vocem per se non habeant Fratres in Monasteriis commorantes. Admittantur tamen ad electionem Discreti ad

Capitulum mittendi in locis, iuxta quae morantur, sicut Fratres ceteri de Conventu.

Teneantur Fratres per obedientiam eligere Disquisitores zelum Dei et communis utilitatis habentes. Et quicumque contra fecerit scienter, tribus diebus in pane et aqua ieiunet. Hanc autem electionem faciant primo die, alioquin Custos eis provideat de Discreto.

Guardianus autem teneat Capitulum, quando de excessibus Ministri et Custodis et eorum insufficientia et de aliis transmittendis ad Capitulum provinciale inquiritur. Cum vero de Guardiani excessibus inquiritur, aliquis eorum institutus a Guardiano de consilio aliquorum Discretorum teneat Capitulum. Praedicti vero de excessibus et insufficientia praelatorum diligenter inquirere teneantur: et alii Fratres teneantur bona fide veritatem de omnibus respondere. Custos vero hujusmodi scrutinio non intersit. Istud autem scrutinium ultra unius diei spatio nolumus prolungari.

Nihil portetur ad Capitulum, nisi quod fuerit discussum et examinatum, probatum legitime et approbatum a maiore parte Fratrum locorum suorum, fideliter conscriptum, lectum et sigillatum coram omnibus loci sigillo, ut ad provinciale Capitulum destinetur. Quicumque contra fecerit, repellatur a Capitulo, et nihilominus graviter puniatur. Quando autem discutiuntur mittenda ad provinciale Capitulum, diligenter examinentur gravia, quae proponuntur, et in speciali de facto, si vidit, de verbo, si audivit ab eo qui accusatur, et inquiratur de loco, tempore et modo. Et haec forma in visitatione qualibet observetur.

Excessus autem Ministri et Custodis, Guardiani et aliorum, qui corrigendi fuerint, coram illis tantum, qui noverant excessus, in provinciali Capitulo audiantur, et qui corrigendi fuerint corrigantur, nisi talis sit excessus, qui sit paena publica puniendus. Item, excessus Guardiani, qui mittentur ad provinciale Capitulum, recitentur ei in publico coram Conventu suo, si ad dictum Capitulum non fuerit profecturus. Et si aliquid grave accidisset in Provincia, vel contigisset in via, quod alias ad Capitulum missum non esset: debeant Fratres, quibus notum est, coram Definitoribus accusare.

Isti in loco Capituli congregati ipsa die quiescant et deliberent usque mane diei sequentis. Et tunc, audita Missa, ingrediantur Capitulum, et invocata Spiritus sancti gratia, fiat sermo Fratribus in communi. Deinde eligant de se ipsis tantum quatuor Definilores per disquisitionem trium, quos Minister, Custos et Guardianus loci, vel duo ipsorum, si tertius defuerit, ad hoc duxerit eligendos.

In huius Capituli principio Custodes et Guardiani conventnales per se, si praesentes fuerint, vel per litteras, si absentes, semper renuntiare teneantur. Quorum renuntiatio a Ministro, vel ab eo qui tenet Capitulum loco eius, cum Definitoribus in fine Capituli, si videbitur, admittatur. Si autem Minister interesse non poterit, Vicarius eius, si fuerit, vel Custos, in cuius Custodia Capitulum celebratur, Capitulum teneat loco eius. - Praedicti vero Definitores possint corrigere provincialem Ministrum, definire et expedire cum ipso omnia, quae ad provinciale Capitulum pertinebunt, quae sunt haec: collatio super transmissis ad Capitulum, correctio eorum quae provinciali Capitulo corrigenda notificabuntur; ordinatio eorum quae ad necessitatem vel honestatem morum Provinciae videbuntur pertinere, cum diversae Provinciae diversis consuetudinibus varientur; nullas tamen faciant constitutiones aut ordinationes ibidem absque maioris partis Capituli consilio et assensu; divisio Custodiarum, ordinatio locorum, receptio, mutatio vel divisio locorum, assignatio librorum notabilium Fratrum decedentium vel ab Ordine recedentium. Et dicimus librum notabilem valentem dimidiam marcham argenti et supra. Definitoribus vero tempore suae definitionis nihil de uniusmodi libris erogetur.

Subditi autem, qui fuerunt Definitores in praecedenti generali seu provinciali Capitulo, in proximo sequenti Capitulo non sint Definitores. Et dicimus hic subditos omnes sub Ministris provincialibus constitutos. Praedicti etiam electores quintum ex se ipsis eligant, qui in hoc tantum possit articulo, videlicet, ut, si quatuor Definitores in correctione Ministri in partes aequales se diviserat, eorum sententia praevaleat, quam idem duxerit approbandam. Idem tamen quintus, qui sic eligitur in Capitulo provinciali, non intelligatur pro Definitore, unde potest sequenti anno eligi Definitor. Electis igitur Definitoribus, litterae, quae super facto provincialis Ministri a Fratribus Iocorum sunt transmissae, eisdem Definitoribus repraesententur ; et si qui sint in eodem Capitulo, qui praeter illa quae scripta sunt, probabilia tamen, habeant dicere de Ministro, Definitoribus tantum dicant . Qui super scriptis aut taliter relatis, habita seorsum diligenti deliberatione, Ministrum corrigant secundum formam superius praetaxatam.

Et quandocumque Definitores voluerint aliquid in Capitulo de Ministro inquirere, teneatur ipse Minister de Capitulo exire: qui si incorrigibilis fuerit, ipsum ab officio ministerii suspendant et sine dilatione causam suspensionis sive incorrigibilitatis per Capitulum approbatam sub sigillo Vicarii et Custodis Ministro significent generali. Quo suspenso, Vicarium de consilio et assensu maioris partis Capituli Definitores constituant. Qui si insufficiens reputatur, eidem similiter significent, ita tamen, quod neutrum horum fiat absque maioris partis Capituli consilio et assensu.

Nihil mittatur ad generale Capitulum, quod non fuerit prius per provinciale Capitulum discussum, examinatum, probatum legitime et approbatum a maiori parte Capituli provincialis, fideliter conscriptum, lectum et sigillatum coram omnibus sigillis Ministri et Custodis et Guardiani loci, in quo Capitulum celebratur, nisi, facto provinciali Capitulo, adeo grave emergat, quod sine gravi periculo usque ad sequens provinciale Capitulum differri non possit. Et si talis eventus non tangat provincialem Ministrum, vel eius Vicarium, praeter alterius eorum consilium non mittatur: si vero Ministrum tangat, per Custodem, Guardianum et Fratres loci, ubi contingit , primo discussum de consilio Vicarii destinetur. Si tangat Vicarium, ab eisdem discussum modo idoneo nuntietur Capitulo generali.

Teneantur autem Capitula provincialia per obedientiam scribere Capitulo generali de excessibus et insufficientia Ministri, de receptione inutilium per eundem et de statu et communi pace Provinciae sub eodem. Et si pax non fuerit, causam turbationis scribant; et sciant, quia secundum illa quae mittentur, procedetur in Capitulo generali.

Nihil autem scribatur Capitulo generali pro petendo Ministro vel commendando ipsum a Capitulo provinciali. Possunt tamen scribere, si quid habent dicere contra eum. Idem modus teneatur circa Custodes et Guardianos ad Capitulum provinciale.