De occupationibus Fratrum. Rubrica VI.

Cum Regula dicat, quod " Fratres, quibus dedit Dominus gratiam laborandi, laborent fideliter et devote "; ordinamus, quod Fratres tam clerici quam laici compellantur per suos Superiores in scribendo, studendo et aliis laboribus sibi competentibus exerceri. Et si quis notabiliter inventus fuerit otiosus, iuxta formam Apostoli usque ad satisfactionem condignam ab aliis sequestretur. Et si Superiores in hoc negligentes fuerint, a Visitatoribus puniantur, qui diligenter inquirant, qualiter ista constitutio servetur.

Si Fratres alicubi indigent obsequiis puerorum saecularium, intra domos Fratrum non iaceant nec ad interiora obsequia admittantur, videlicet infirmariae, refeclorii vel coquinae, sed magis ipsi Fratres pro Christo humilitatis officia non recusent. Et si quis Guardianus, vel vicarius, praeter evidentem necessitatis articulum aliter fieri permiserit, pro qualibet vice una refectione a pulmento abstineat, vel a vino.

Confessores audiant confessiones horis certis a provinciali Capitulo ad hoc statutis. Nullus sacerdos confessiones Religiosorum aut saecularium audiat absque licentia sui provincialis Ministri, et obtenta licentia dioecesani episcopi, vel proprii sacerdotis, et nullus hanc licentiam petat sine sui Ministri licentia, vel Custodis. Item, Minister nullos licentiet, nisi quos cum magna deliberatione discretos probaverit et securos: et hoc in provinciali Capitulo tantum fiat. Item, nullus Frater pro confessione audienda, seu quacumque alia de causa iuxta mulierem stet aut sedeat, nisi ubi ipse et eius socius libere possint mutuo se videre. Et caveant omnes Fratres a prolixis colloquiis mulierum. Et quicumque contra fecerit, a sociis accusetur.

Nullus Frater monasteria aliqua Monialium vel aliqua habitacula mulierum fieri aliqua ratione procuret. Nec a muliere votum continentiae requirat, seu oblatum recipiat, aut ad faciendum sibi obedientiam inducat. Et quicumque contra fecerit, tribus diebus tantum in pane et aqua ieiunet.

Nullus Frater procuret per se, vel per alium quoquo modo, committi sibi vel abi Fratri aliqua negotia procuranda per reges, principes, vel praelatos, seu communitates, nec procuret, quod maneat vel equitet cum eisdem. Si quis contra fecerit, beneficiis Ordinis ipso facto indignus habeatur, et si sacerdos fuerit, ipso facto suspensus sit a confessionibus audiendis.

Item, quicumque Frater sine licentia Ministri generalis archiepiscopatum vel episcopatum receperit, nisi per talem obedientiam compellatur, quam transgrediendo peccaret mortaliter ; ipsum statuto praesenti liberis suffragiis, societate et beneficiis Ordinis tam in vita quam in morte privamus. Idem de illis statuimus, qui promoti sunt, quorum vita infamis in scandalum Ordinis noscitur redundare.

Item, nullus Frater ordines recipiat sine licentia sui provincialis Ministri, vel Custodis, cui provincialis Minister licentiam dederit. Et quicumque contra fecerit, a suscepto ordine suspendatur, quousque a generali seu provinciali Ministro secum fuerit dispensatum.

Nullus praedicatorum praedicet, quamvis secundum Regulam fuerit examinatus, cum prohibitus fuerit a suo Ministro provinciali.

Prohibemus, ut de cetero Fratres, qui nesciunt legere Psalterium, litteras non addiscant, nec alii eos doceant. Et si quis contra fecerit, a communione officii et mensae separetur usque ad satisfactionem condignam. Et de laicatu ad clericatum nullus ascendat absque licentia Capituli generalis.

Item, mittendi Parisios ad studendum primo exerceantur tribus, vel duobus annis post novitiatum in aliquo studio suae provinciae, vel vicinae, nisi adeo fuerint litterati, quod post novitiatum continuo possint mitti. Non mittantur nisi tantum de auctoritate Ministri cum consilio et assensu Capituli provincialis. Taliter autem missi studeant quatuor annis ad minus, nisi adeo fuerint provecti, quod merito iudicentur idonei ad lectoris officium exsequendum.

Circa mittendos autem attendatur, quod sint ad proficiendum habiles, fortes corpore, eloquentiae bonae et conversationis honestae, non contentiosi, sed mites et pacifici inter Fratres. Teneantur autem Fratres mittere illos quos iudicaverint idoneos magis secundum conditiones praemissas. Si autem aliquem miserint, qui propter defectus notabiles sit indignus: tribus diebus tantum in pane et aqua ieiunent, illi scilicet, quorum consilio est transmissus . fidem modus teneatur circa alios, qui ad alia generalia studia transmittuntur, et eidem praecepto et poenae subiaceat qui scienter consuluerit de aliquo, vel praesentaverit aliquem ad praedicationis vel confessionis officium, de cuius vita et spe proficiendi in exsecutione iniungendi talis sibi officii probabiliter dubitatur. Quodsi aliquis se, vel alium per saeculares personas procuraverit mitti ad studium generale ; ipso facto omnibus officiis Ordinis sit privatus, quousque per Generalem secum fuerit dispensatum. Insuper quicumque procuraverit, se ad Ordinis officia promoveri, sicut indignus ab omnibus officiis repellatur].

Possit autem quaelibet provincia habere duos studentes Parisius sine aliqua provisione, quibus provideatur in libris secundum arbitrium provincialis Capituli et Ministri.

Teneantur studentes in suo reditu de tota provisione reddere rationem, et caveant, ne eleemosynas sibi missas pro libris in alios usus commutent , nec libros fieri faciant curiosos.

Item inhibemus, ne de cetero aliquod scriptum novum extra Ordinem publicetur, nisi prius examinatum fuerit per generalem Ministrum, vel provincialem et Definitores in Capitulo provinciali. Et quicumque contra fecerit, tribus diebus tantum in pane et aqua ieiunet et careat illo scripto . [Nullus Fratrum audeat aliquam opinionem asserere vel approbare scienter, quae a magistris nostris communiter reprobatur: nec opinionem singularem cuiuscumque suspectam vel calumniabilem, maxime contra fidem vel mores audeat defensare. Et qui contra fecerit, nisi admonitus per Ministrum resipuerit, ab omni doctrinae officio sit suspensus].

Nullus Frater libros scribat vel scribi faciat ad vendendum, nec Minister provincialis audeat habere vel retinere aliquos libros sine licentia Ministri generalis; nec aliqui Fratres accipiant vel habeant absque licentia suorum provincialium Ministrorum: et nulla Biblia emenda pretium viginti librarum Turonensium excedat. Si contingat, aliquem Fratrem transferri de una Provincia ad aliam ad morandum, libros sibi concessos ad usum possit habere: post mortem vero suam libri scripti vel empti de eleemosyna ad illam Provinciam revertantur, ad quam dicta eleemosyna pertinebat; et ad hoc fideliter faciendum Ministri firmiter, in quorum Provinciis decesserit, teneantur. Et ut hoc melius observetur, Fratres, qui transferuntur, relinquant in scripto nomina librorum valentium ultra quartam partem marchae Ministris illis, de quorum administrationibus transferuntur.

Nullus libros aliquos retineat sibi assignatos, nisi sint totaliter in Ordinis potestate, quod libere per Ministros dari valeant et auferri. Nullus Frater Bibliam, vel Testamentum de eleemosyna habeat, nisi sit ad studium aptus, vel ad praedicandum idoneus: et hoc de licentia suorum Ministrorum. Ministri, cum Fratres suos visitant, libros et res alias sibi faciant resignari, et si quem libros habere praeter necessarios invenerint, dispensent cum Definitoribus in Capitulo provinciali non habentibus, volentibus de illis fructum facere animarum.