De FORMA INTERIUS CONVERSANDI. Rubrica IV.

Cum secundum Regulam teneamur duas Quadragesimas ieiunare, et intermedia suadeatur cum benedictione divina: ex hujusmodi amore benedictionis statuimus, quod tali hora comedant Fratres, ut omnes, qui ieiunare volunt, non graventur, scilicet hora sexta . Apostolorum Vigiliae ieiunentur intus et extra, beatorum Philippi et Iacobi et Ioannis Evangelistae et Barnabae tantum exceptis. Vigilia beati Bartholomaei ieiunetur, et festum secundum morem patriae fiat . Vigilia beati Francisci ieiunetur. Ieiunia Regulae in cibo quadragesimali serventur: et quotiescumque quis contra fecerit, toties in pane tantum et aqua ieiunet, nisi in itinere positus pisces habere non poterit vel pulmentum. Quadragesimalis ieiunii observantia a Quinquagesima inchoetur. In locis Fratrum Fratres carnes non comedant ullo tempore, exceptis debilibus et infirmis. Et nomine debilium nolumus intelligi hospites euntes intra suam provinciam, nisi pro necessitate vel utilitate communi contigerit eos prolixam viam ire: nec minutos ratione minutionis; et quicumque contra fecerit, uno die sine dispensatione in pane tantum et aqua ieiunet. Possit tamen Guardianus illis providere, quos pro debilitate iudicaverit rationabiliter indigere. Quodsi manus scienter laxaverit ad alios, ad consimilem paenitentiam sit astrictus. Comestiones etiam carnium extra domum Fratrum per Fratres nullatenus procurentur: et quicumque contra fecerint, tribus diebus in pane tantum et aqua ieiunent .

[ltem, contra superfluitatem ciborum statuimus, quod Fratres tam in generali Capitulo quam in provinciali quam etiam in Conventu, sive in refeclorio, sive in ostalaria , sive infirmeria, uno tantum ferculo pro pietantia sint contenti et caveant pro posse a sumptuosis cibariis. Nec bibant in civitate vel villa, ubi Fratres morantur, nec comedant nisi cum praelatis et dominis terrarum et viris religiosis: et quicumque scienter contra fecerit, ad bibendam aquam in uno prandio intra hebdomadam obligetur. Item, in diebus Sabbatorum sagimine vel alia carnium pinguedine pulmenta non condiant, et nunquam coquinae Conventus commisceant carnes tritas].

Item, cum dicatur in Regula, quod " Fratres desiderare debent habere spiritum Domini et sanctam eius operationem, orare semper ad Deum puro corde "; ne devotionis fervor per inquietudinem multiloquii exstinguatur, ordinamus, quod silentium a dicto Completorio usque post Pretiosa servetur, exceptis hospitibus de novo venientibus et infirmis et eisdem ministrantibus vel assistentibus, usque ad horam congruam de Guardiani sui licentia speciali. Sileatur etiam in claustro, dormitorio, choro, studio et refeclorio, dum comeditur: et hoc tam a forensibus quam a residentibus observetur. Similiter lora dormitionis a Pascha usque ad festum Exaltationis sanctae Crucis. [Quolibet autem die post seundam mensam immediate pulsetur campana refetorii, et ex tunc sileatur usque ad Nonam. In diebus eiuniorum simili modo a pulsata campanella sileatur, usquequo fiat signum ad surgendum secundum spaium a Guardiano provide ordinatum] Liceat tamen breviter et submisse significare quod necesse est. Et quotiescumque aliquis scienter, leviter tamen, silentium fregerit, dicat pro qualibet vice unum Miserere mei, Deus, vel tribus vicibus Pater noster: si quis vero notabiliter contra fecerit per clamosam vel prolixam silentii fractionem, dicat in Capitulo culpam suam, has differentias , prout se deliquisse meminerit, exprimendo.

Dicimus autem clamosam, quae perturbare potest circumstantes, prolixam, quae protenditur ultra spatium Miserere mei, Deus, cui a Guardiano abstinentia a pulmento, vel a vino, vel ab utrisque secundum culpae exigentiam imponatur. Nullus Frater habeat cameram clausam [vel a dormitorio sequestratam, Ministris exceptis et lectoribus in generalibus studiis constitutis ].

Item, nullus Frater a culparum Capitulo per praelatum aliquando eximatur: hospites etiam in locis, ubi ultra tres dies moram contraxerint, dicant in Capitulo culpas suas, et dicta culpa et accepta paenitentia, egrediantur. Omnes Fratres, tam clerici quam laici et forenses, post recreationem acceptam secundum exigentiam itineris et laboris veniant ad Completorium, et nullus remaneat sine causa legitima, et hoc de praelati sui licentia speciali. Et quicumque contra fecerit, uno prandio vino careat, vel pulmento.

Fratres omnes hospites suscipiantur in visceribus caritatis, maxime venientes de extraneis provinciis et longinquis. Et si quando Fratres Praedicatores ad loca nostra venerint, velut Fratres nostri Ordinis benigne et caritative suscipiantur, et seminantes inter nos et ipsos scandala graviter puniantur.

Fratres quindecim vicibus radantur in anno temporibus consuetis, et sit rasura non modica, sicut decet Religiosos, sic ut inter ipsam et aurem non sint plures, quam tres digiti. Tonsuram non desuper aures tam clerici quam laici facere procurent, et fiat temporibus opportunis. Et eisdem diebus communicent Fratres, nisi remanserint de licentia speciali. [Et tunc fiat sermo Fratribus in communi ]. Ad illud altissimum Sacramentum diligenter se praeparent Fratres omnes. Et ut hoc melius fiat, statuimus, ut singuli determinatos de licentia Guardiani habeant confessores, quibus bis ad minus confiteantur in qualibet septimana. Et de hoc solliciti sint Guardiani, ut per utriusque Sacramenti frequentiam sanctae conversationis in utroque homine puritas observetur.