Quaestio XXIV.

Quaeritur, quomodo Fratres habeant domos, areas, hortos.

Item quaero: cum Regula vestra dicat, quod nihil proprium debeatis habere nec in speciali nec in communi: et vos habetis domos, areas, hortos, libros, vestes et alia victui necessaria pro tempore, quomodo potestis hujusmodi transgressionis culpam excusare bona conscientia ?

Respondeo. Videmus in saeculo, famulos dominorum panem non suum comedere, tecto non suo contegi et rebus alienis uti, videlicet dominorum suorum. Sic et alii saepe concessis utuntur tam vestibus quam aliis rebus de illorum voluntate, quorum res sunt. Sic et nos utimur rebus necessariis pro corpore, quas tamen nec in speciali nec in communi nobis appropriamus. Regula enim non dicit, nos nihil debere habere, sed nihil nobis appropriare. Unde usum rerum necessariarum habere possumus,

non proprietatem, alioquin nec vestem nec cibum, nec aliquid aliud in usum recipere deberemus, quod esset contra omnem rationabilem intellectum. Praesul toto Sedis apostolicae , qui est generalis omnium pauperum Ecclesiae provisor, specialiter nostri Orditus curam habens, omnium mobilium, quae Ordini conferuntur, proprietatem sibi assumsit, exceptis his quorum dominium sibi conferentes retinuerunt, et nobis usum earundem rerum solum concedit, ut semper alieno victu et vestitu et tecto et aliis utensilibus absque proprietatis iure ex ipsius concessione utamur, sicut familia patrisfamilias, quae rebus domini sui utitur tam in absentia quam in ipsius praesentia corporali secundum ipsius dispositionem. Et eleemosyna, quae nobis a fidelibus datur, transit in usum nostrum et in illius dominium, qui est principalis Ordinis nostri dispensator, cui parati sumus omnia, quae habemus, cum iusserit, tanquam domino, prout convenit, resignare. Nil iuxta hoc proprietatis habentes, Regulam nostram bona conscientia observamus.