Quaestio XII.

Cur Fratres a Sede apostolica obtineant iudices et conservatores.

Cum deberetis omnia mala vobis illata patienter sustinere et nullam super his apud iudices querimoniam facere vel movere, quid est, quod non solum istud non facitis, sed etiam, non contenti episcoporum iudiciis, obtinetis a Sede apostolica iudices et conservatores , et ad illos quoslibet molestantes vos etiam leviter citatis et gravatis laboribus et expensis, donec satisfaciant vobis pro velle vestro, contra

Apostolum primae ad Corinthios : Delictum est in vobis, quod iudicia habetis?

Respondeo. Iniurias et molestias, ex quibus aliud malum non sequitur, nisi quod illa hora sentiri potest, ut sunt verba probrosa vel damna rerum seu verbera et similia, possunt viri religiosi aequanimiter sustinere, quia nil aliud afferunt nocumenti. Sed ubi possunt graviora damna subsequi, videlicet animarum gravia nocumenta, ibi non est expediens talia tolerare. Nam cum simus in Ecclesia Dei ad multarum animarum salutem a Sede apostolica destinati per officium docendi et extrahendi homines a peccato ; si quis iufamaret Ordinem nostrum, quod essemus seductores, aut haeretici, aut criminosi, aut non habentes auctoritatem praedicandi seu confessos nobis et contritos absolvendi, cum a domino Papa, vel etiam episcopis habeamus : non solum laederet nos sic reddendo despicabiles hominibus, quod subtraherent nobis beneficia, sine quibus sustentari non possumus, sed etiam noceret omnibus, qui ex hoc inciperent nos persequi et graviter peccarent. Et qui crederent, nos tales esse, sicut ille assereret, nec praedicationes nostras attenderent nec consilia salutis requirerent a nobis, et iam nullus Ordinem intrare curaret, immo debiles mente Ordinem tentarentur relinquere, quem viderent ab omnibus conculcari.

Insuper haeretici se detractoribus nostris libenter adiungerent sub specie amicitiae, ut nos amplius redderent odiosos ad hoc, ut doctrinam nostram hominibus redderent odibilem, et ita astute sibi attraherent corda eorum et paulatim ducerent in errorem, cum nos maxime timeant, modo in hoc sibi esse resistentes. Plura alia mala suscitarent nobis veritatis adversarii, si non haberemus munimen per Sedem apostolicam, quae non tam nobis quam Ecclesiae et fidei catholicae valde nocerent, et haec in dedecus ipsius Sedis redundarent, quae Ordinem plantavit et confirmavit et ad profectum Ecclesiae destinavit. Nam et Apostolus Paulus, qui paratus erat omnia adversa subire pro Christo, videns, obesse fidei et Ecclesiae, si traditus fuisset a Felice vel Festo Iudaeis ipsum perimere cupientibus, Caesarem appellavit, Actuum vigesimo quinto . Ut ergo parcamus eis a peccato iniquae persecutionis et nobis a frequenti vexatione et aliis a nocumento animarum, conservatores habemus a Sede apostolica nobis datos, qui privilegiorum nostrorum iura defendant et a calumniantibus tueantur.