DANIEL PROPHETA.

Anno tertio Joakim

Imperatrix Prophetarum. Maria dicitur mons comminutionis diaboli et peccatorum. Daniel. ii, 34 et 35 : Abscissus est lapis. Glossa: id est, Christus, de monte, id est, de Maria, quae est mons coagulatus, mons pinguis, mons in quo beneplacitum est Deo habitare in eo . Sine manibus abscissus, id est, absque opere viri generatus, et percussit statuam, id est, diabolum, et omnes superbos, et comminuit eos, Psal. XVII, 43 : Comminuam eos ut pulverem, etc. Lapis autem, qui percusserat statuam, factus est mons magnus, magnus in natura, magnus in potentia, magnus in misericordia, magnus in vindicta. Et implevit universam terram, et caelum. Glossa : per gloriam, caelum. Habacuc, III, 3 : Operuit caelos gloria ejus. Per misericordiam, terram. Psal. xxxii, 5 : Misericordia Domini plena est terra. Infernum dolore, et miseria. Unde, Job, x, 22 : Terram miseriae ei tenebrarum.

Item, Ipsa est arbor quae multipliciter commendatur, Daniel. IV, 7 et seq. Primo, commendatur a communitate,

ibi, Videbam, et ecce arbor in medio terrae, id est, Maria in medio Ecclesiae, omnes respiciens, et quantum in se est, communiter ad omnes se habens.

Secundo, a dignitate, ibi, Et altitudo ejus nimia. Bernardus : " O Virgo, virga sublimis, in quam sublime verticem sanctum erigis, usque ad sedentem in throno, usque ad Dominum majestatis. Neque enim id mirum : quoniam in altum mittis radices humilitatis . " Et magna. Glossa : virtutum magnitudine.

Tertio, a fortitudine, ibi, Et fortis. Glossa: contra diabolum, mortem, et peccatum. Require illud Proverbiorum, XXXI, 10: Mulierem fortem quis inveniet? Et proceritas ejus contingens caelum, id est, Christum Deum.

Quarto, a misericordia ad omnes, ibi, Adspectus illius. Glossa: misericordiae,

erat usque ad terminos universae terrae. Glossa: Non solum ad Angelos, et justos, sed etiam peccatores : imo ad illos qui sunt in purgatorio.

Quinto, a foecunditate, ibi, Folia ejus pulcherrima, id est, verba, quae dixit ad Angelum, ad cognatam, ad Filium, ad. ministros. Et fructus ejus nimius, id est, Christus Jesus, qui sufficit et Angelis, et hominibus.

Sexto, a cibatione, quia cibat omnes, ibi, Et esca universorum in ea, id est, Angelorum, et hominum.

Septimo, a fidelissima protectione, ibi, Subter eam, id est, sub protectione ejus, habitabant, confidenter et laetanter, animalia et bestiae, id est, miseri peccatores, propter refectionem, protectionem, pausationem,et pulchritudinem.

Octavo, a jucunditate, quam habent omnes Sancti in ea, ibi, Et in ramis ejus, scilicet virtutum, videlicet humilitatis, misericordiae, charitatis, etc, conversabantur volueres coe, id est, omnes Sancti, et ex ea vescebatur omnis caro, quoniam alit omnes.

OSEE P 1.OPHETA.

Verbum Domini, quod factum est ad Osee .

Beata Virgo Maria est vitis fructificationis. Osee, X, 1 : Vitis frondosa Israel, id est, Maria omni gratia plena, habens bonas propagines, fructus adaequatus est ei. Hic fructus excellit omnes alios, in quantitate, et qualitate, sanctitate, suavitate.

Osee, XIV, 6 : Ero quasi ros. Glossa : aestum aestuantis incendii et libidinis auferam, hoc rore infusa.

Item, Semper ad pietatis opera erumpit. Osee, XIV, 6 : Erumpet radix ejus. Glossa : id est, bona voluntas ad effectum boni operis perducetur, ut Libani.

Et infra, V. 7 : Ibunt rami ejus de virtute in virtutem ,

Item, Ipsa est mater misericordiae. Ibidem, XIV, 7 : Erit quasi oliva gloria ejus, Glossa: per opera misericordiae : ei odor ejus ut Libani, Et infra, V. 8 : Memoriale ejus sicut vinum Libani, quod diversis pigmentis conditum, suavem odorem emittit. Bernardus : " Laudamus virginitatem, humilitatem miramur, sed misericordia miseris sapit dulcius, misericordiam amplectimur charius, recordamur saepius, crebius invocamus, etc. . "