302 Acta Apostolicae Sedis - Commentarium Officiale

ARIMINENSIS

Beatificationis et Canonizationis Amati Ronconi e Tertio Ordine Sancti Francisci

Fundatoris Hospitalis Pauperum Peregrinorum in oppido Saludecio nunc v.d. « Casa

di riposo Opera Pia beato Amato Ronconi » († 1226-1292)

DECRETUM SUPER MIRACULO

Beatus Amatus Ronconi anno circiter 1262 Saludecii intra fines dioecesis

Ariminensis in Italia e locupleti familia natus est. Primam institutionem

christianam domi recepit ac studium didicit orationis. Parentibus orbatus,

una cum sorore Clara a fratre suo maiore institutus est, cui autem ob ho-

norum mundi utique neglectum ac pietatem christianam illam, quae eum

ad adiuvandos pauperes magnopere trahebat, iamiam invisus factus est.

Iuventutis tempore, novarum dissensionum causa familiam relinquere de-

crevit et servilem administri operam apud agricolas quosdam coepit dare.

Tertio Ordini Sancti Francisci porro adhaesit et, ad Montem Urtialem de-

migratus, in vitam summae paenitentiae paulatim sese mersit, profundam

spiritualitatem expertus est et ad diversa Sanctuaria peregrinum se contulit.

Modesta domus eius, interdum, pro innumeris peregrinis transeuntibus locus

refectionis fieri inceperat et citius hospitium facta est in honorem Nativitatis

Beatae Mariae Virginis dicatum: Beatum, enim, omnibus aerumnis quibusvis

laboratis nullomodo pudebat ministrare. Hoc in incepto a sorore admodum

suffulciebatur, quae consecrationis rationem cum eo communicabat. Fenum

arvorum suorum Beatus et laboris universum largitus est, ut opus tantum

iniret ac sustentaret, quod publice anno 1292 institutum est. Eodem autem

anno, fortasse die 8 mensis Maii, Amatus mortem occubuit et, iuxta votum

suum, in sacello hospitii sepultus est. Vir ad sensum fidelium eximia vitae

sanctitate probatus, statim post mortem uti Beatus excultus est. Summus

Pontifex Pius VI anno 1776 cultum eius confirmavit.

Annis 1997-1999 apud Curiam Ariminensem Inquisitio dioecesana super

vita et virtutibus Beati Amati celebrata est. Deinde Positio, favente cum exi-

tu, a Consultoribus Historicis examinata est anno 2010. Consultores Theologi

et Patres Cardinales et Episcopi anno 2013 de virtutibus disceptaverunt et

die 9 mensis Octobris eodem anno, Summus Pontifex Franciscus virtutes

heroice exercitas decreto approbavit.